لە دهۆک دوای 20 کاتژمێر ئاگر نزیکەی 300 دۆنم دارستان سووتا

ئاڤا نیوز

 

بەهۆی ئەو ئاگرەی لە سنەوبەرەکانی زاویتە کەوتەوە، زیاتر لە 300 دۆنم دارستان سووتا. وتەبێژی بەرگریی شارستانیی دهۆکیش دەڵێت، دوای زیاتر لە 20 کاتژمێر توانرا ئاگرەکە کۆنترۆڵ بکرێت.

 

چیرۆکی سەرەکی: ئێوارەی ڕۆژی پێنجشەممە 3/7/2025، ئاگرێکی گەورە لە دارستانی سنەوبەرەکانی زاویتە کەوتەوە و بەهۆیەوە زیانێکی زۆر بەر دارستانەکە کەوت. هاوکات دوای زیاتر لە 20 کاتژمێریش توانرا ئاگرەکە کۆنترۆڵ بکرێت.

 

لێدوانی فەرمی: عەقید بێوار عەبدولعەزیز، وتەبێژی بەرگریی شارستانیی دهۆک بە ئاڤا میدیای گوت: بە بەشداری حەوت تیمی بەرگریی شارستانیی، هێزی دهۆکی پێشمەرگەی ژینگە، بەڕێوەبەرایەتی دارستان و پاوان و تیمی فڕۆکەوانی، دوای زیاتر لە 20 کاتژمێر ئاگرەکە کۆنترۆڵ کرا، بەهۆی ئەو ئاگرەوە زیاتر لە 300 دۆنم دارستان سووتا.

 

- هۆکاری ئەم ئاگرە تا ئێستا دیار نییە و لیژنەیەک بۆ بەدواداچوون لە هۆکاری ئاگرەکە پێکهێنراوە.

 

ژمارەکان وادەڵێن: لە سەرەتای ئەمساڵەوە 450 ئاگر لە سنووری پارێزگای دهۆک کەوتوونەتەوە، لەو ڕووداوانە سێ کەس لە سووتان ڕزگار کراون و دوو کەسیش گیانیان لەدەست داوە، بەشی زۆری ئاگرەکانیش سووتانی دارستان و پووش و پەڵاش بوونە.