بافڵ تاڵەبانی لەبارەی مووچەوە پەیامێک ئاراستەی بەغدا دەکات

ئاڤا نیوز


بافڵ جەلال تاڵەبانی، لە کۆبوونەوەی لەگەڵ ستیڤ بیتنەر، کونسوڵی گشتیی ئەمریکا لە هەرێمی کوردستان پەیامێک ئاراستەی بەغدا دەکات و ڕایدەگەیەنێت: نابێت ئەو لێکتێگەیشتنەی لەسەر مووچە کراوە بەربەستی بۆ دروستبکرێت.


چیرۆکی سەرەکی: 15ـی تەممووزی 2025، لە شاری بەغدا، بافڵ تاڵەبانی بە ئامادەبوونی فوئاد حوسێن لەگەڵ هەریەک لە سوودانی و فایەق زێدان، سەرۆکی باڵای ئەنجوومەنی دادوەریی عێراق کۆبووەوە. بەگوێرەی ڕاگەیێنراوی نووسینگەی سەرۆکوەزیرانیش، لە کۆبوونەوەکەی سوودانی و بافڵ تاڵەبانی گفتوگۆ لەسەر دۆسیەی مووچەی فەرمانبەرانی هەرێمی کوردستان و داهاتە نەوتی و نانەوتییەکان کرا. 


ڕاگەیێنراوی فەرمی: میدیا فەرمی یەکێتیی بڵاویکردەوە، سەرۆکی یەکێتیی نیشتمانیی کوردستان لە دەباشان پێشوازی لە ستیڤ بیتنەر، کونسوڵی گشتیی ئەمریکا لە هەرێمی کوردستان کرد و لە کۆبوونەوەکە دوایین گۆڕانکارییە سیاسییەکان تاوتوێکران و جەخت لە پەرەپێدانی پەیوەندی و هاریکارییەکانی نێوان هەرێمی کوردستان و ئەمریکا کرایەوە.

بافڵ تاڵەبانی لەمیانەی کۆبوونەوەکە ڕایگەیاندووە: نابێت ئەو لێکتێگەیشتنەی لەسەر مووچە کراوە بەربەستی بۆ دروستبکرێت، هەوڵی خۆمان خستووەتەگەڕ بۆ جێبەجێکردنی و بەردەوام لەگەڵ تەواوی لایەنە پەیوەندیدارەکان لە پەیوەندیداین.