سێ ساڵ دەبێت بەهای دۆلار لەم ئاستە جێگیر نەبووە

ئاڤا نیوز

وتەبێژی بازاڕی دۆلارەکەی سلێمانی دەڵێت، سێ ساڵ دەبێت بەهای دیناری عێراقی بەرامبەر دۆلار هێندە بەرز نەبووە، ئەمڕۆ لە بازاڕەکانی گۆڕینەوەی دراو، 100 دۆلاری ئەمریکی بەرامبەر 138 هەزار و 100 دیناری عێراقی بووە.

وێنە گەورەکە: ماوەی چەند ساڵێکە بەهای دیناری عێراقی بەرامبەر دۆلار جێگیر نییە، لە دوو ساڵی ڕابردوودا 100 دۆلار تاوەکو سەروو 160 هەزار دیناری عێراقی مامەڵەی کڕین و فرۆشتنی پێوە کراوە.

لێدوانی فەرمی: جەبار گۆران، وتەبێژی بازاڕی دۆلارەکەی سلێمانی بە ئاڤا میدیای ڕاگەیاند، لە ساڵی 2022ـەوە تەنیا یەک جار بۆماوەی چەند کاتژمێر بەهای دۆلار تا 139 هەزار دیناری عێراقی هات، لەو کاتەوە لە سەروو 140 هەزار دینارەوە بووە. لەم چەند ساڵەدا یەکەمجارە نرخی دۆلار بەرامبەر دیناری عێراقی لەم ئاستە جێگر بێت.

هۆکارە زانراوەکان: بەرزبوونەوەی بەهای دیناری عێراقی بەرامبەر دۆلار بۆ دوو هۆکار دەگەڕێتەوە:

هۆکاری یەکەم: کەمی نەختینەی دینار لە بازاڕ. لەلایەکی دیکە نەهاتنی مووچەی فەرمانبەرانی هەرێمی کوردستان کاریگەری هەیە. هەروەها ماوەی سێ مانگ دەبێت هیچ بڕە پارەیەکی دیناری عێراقی لە ڕێگەی مووچەوە نەهاتووەتە بازاڕ، ئەمەش کورتهێنانی زۆری لە بازاڕی گۆڕینەوەی دراو دروست کردووە.

هۆکاری دووەم: پەیوەندیی هەیە بەو حەواڵەیەی کە بەشێک لە بانکەکان ڕۆژانە دەیکەن، ئەگەر 300 ملیۆن دۆلار بۆ دەرەوە حەوالە بکەن، 50 ملیۆن دۆلاری دەهێننەوە بازاڕەکانی عێراق، بەمەش دۆلارێکی زۆر دێتەوە بۆ بازاڕەکانی عێراق و ئەمەش کاریگەری لەسەر بەرزبوونەوە و نزمبوونەوەی دۆلار دەبێت.