نرخی مس 13% بەرز دەبێتەوە؛ چین هۆکارە

ئاڤا نیوز

 

نرخی کانزای مس لە بازاڕەکانی جیهاندا لە بەرزبوونەوەدایە، شارەزایەکی بواری ئەو کانزایەش لەوبارەیەوە دەڵێت، "ئێستا خواست لەسەر کڕینی مس زۆرە".

 

وێنە گەورەکە: نزیکەی دوو مانگە بە بەردەوامی نرخی مس لە بازاڕەکانی جیهاندا بەردەوام لە بەرزبوونەوەدایە، بە وتەی شارەزایانی بوارەکەش ڕۆژانە خواست لەسەر کڕینی مس لەلایەن وڵاتانی وەک چین زیاتر دەبێت، ئەوەش کاریگەری لەسەر نرخی کانزاکە دروست کردووە.

 

لێدوانی فەرمی: مەجروم ڕەسوڵ، بازرگان و پسپۆڕی بواری مس لە هەرێمی کوردستان، بە ئاڤا میدیای ڕاگەیاند: لە ماوەی دوو ڕۆژدا نرخی هەر تۆنێک مس 300 دۆلار زیادی کردووە، واتە 5% نرخەکەی بەرزبووەتەوە، ئەمڕۆش تۆنێک مسی خام لە بازاڕەکانی جیهاندا بە 11 هەزار و 200 دۆلار مامەڵەی پێوە دەکرێت، لە هەرێمی کوردستانیش تۆنێک مسی سکراب بە هەشت هەزار و 500 دۆلار دەکڕدرێت.

 

ئەو بازرگانە دەشڵێت، تەنیا لە ماوەی دوو مانگدا 13% نرخی مس بەرزبووەتەوە، پێشبینی دەکەین تاوەکو مانگی 10ی ئەمساڵ نرخەکە زیاتر بەرزببێتەوە.

 

زانیاریی زیاتر: پێشتر لە هەرێمی کوردستان هەر تۆنێک مسی سکراب بە هەشت هەزار و 700 دۆلار مامەڵەی پێوە دەکرا، بەڵام ئێستا یەک تۆن مسی سکراب بە نزیکەی 10 هەزار دۆلارە.

 

ئەمەش بزانە: ئێستا کارگەیەکی مس لە هەولێر و دوو کارگەی دیکە لە سلێمانی دروست کراوە، تەنیا کارگەکەی هەولێر توانای وەرگرتنی 40 هەزار تۆن مسی سکراب و توانای بەرهەمهێنانی 80 هەزار تۆن کێبڵ و مسی خامی لە ساڵێکدا هەیە.