نرخی نەوت بۆ بەرزترین ئاست لە شەش هەفتەدا بەرز دەبێتەوە

ئاڤا نیوز

 

دوای هەڕەشەکەی سەرۆکی ئەمریکا لە ڕووسیا، ئەمڕۆ نرخی نەوت 3.5% بەرزبووەوە و گەیشتە 72 دۆلار و 56 سەنت، ئەوەش بەرزترین نرخی نەوتە لە شەش هەفتەی ڕابردوودا.

 

بۆچی گرنگە: بەرزبوونەوەی نرخی نەوت کاریگەری ئەرێنی لەسەر بودجەی عێراق دەبێت، چونکە عێراق مانگانە پێویستی بە زیاتر لە 8 ترلیۆن دینارە بۆ دابینکردنی مووچەی فەرمانبەرانی، دابەزینی نرخی نەوتیش بۆ خوار 70 دۆلار، مەترسی بۆ عێراق دروست دەکات و ڕووبەڕووی کێشەی دارایی دەکاتەوە.

 

ژمارەکان وادەڵێن: بەگوێرەی بۆرسەی بازارەکانی نەوت، ئەمڕۆ چوارشەممە نرخی بەرمیلێک نەوت لە بازارەکانی جیهاندا بە 72 دۆلار و 56 سەنتە، نرخی بەرمیلێک نەوتی تێکساسیش بە 69 دۆلار و 20 سەنتە.

 

هۆکارە زانراوەکان: ڕۆژی سێشەممە دۆناڵد ترەمپ، سەرۆکی ئەمریکا هەڕەشەی لە ڕووسیا کرد کە ئەگەر لە ماوەی 10 ڕۆژدا ئاگربەست لەگەڵ ئۆکرانیا ڕانەگەیێنێت، سزای ئابووری زیاتر بەسەر ئەو وڵاتەدا دەسەپێنێت.