ماوەی پڕکردنەوەی فۆڕمی ئەلیکترۆنی خۆراک تا 25ـی ئەم مانگە درێژ کرایەوە

ئاڤا نیوز

بەڕێوەبەری گشتیی بازرگانی لە ڕێگەی ئاڤاوە هاونیشتمانیان دڵنیا دەکاتەوە، کە ماوەی پڕکردنەوەی فۆرمی ئەلیکترۆنی خۆراک درێژکراوەتەوە و بەشە خۆراکی مانگانەی هیچ کەسێک نابڕدرێت.

چیرۆکی سەرەکی: ئەمڕۆ ئەو وادەیەی بۆ کۆتاییهاتنی پڕکردنەوەی فۆرمی خۆراک دیاریکرابوو، لە كاتژمێر 12:00ـی شەو كۆتایی دێت، ئەگەرچی خۆتۆماركردن لە ئەپەكە تاوەكو 31ـی ئەم مانگە بەردەوام دەبێت، بەڵام چەند گۆڕانكارییەكی بەسەردا دەهات لە بەرژەوەندیی ئەو كەسانە نەبوو كە تا ئێستا فۆرمەكەیان پڕنەكردووەتەوە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت، "کەمێک پێش ئێستا بڕیارمان بۆهات کە تاوەکو 2025-08-25 وادەی پڕکردنەوەی قۆناغی یەکەمی پرۆسەکە درێژ کراوەتەوە، بەشە خۆراکی هیچ کەسێک نابڕدرێت و پرۆسەکەش بەخۆڕایی دەبێت."

ژمارەکان وادەڵێن: بە گوێرەی دوایین ئاماری وەزارەتی بازرگانی هەرێمی کوردستان، ڕێژەی 83%هاونیشتمانیان فۆڕمەکەیان پڕکردووەتەوە، بەمشێوەیە:-

هەولێر: 85%

هەڵەبجە: 88%

سلێمانی: 84%

دهۆک: 79%