هاوردەکردنی ئۆتۆمبێلی چینیی بۆ عێراق 75% زیاد دەکات

ئاڤا نیوز

 

شارەزایەکی ئابووری دەڵێت، بەراورد بە ساڵی ڕابردوو، لەنیوەی یەکەمی ئەمساڵدا هاوردەکردنی ئۆتۆمبێل لە چین، ژاپۆن و کۆریای باشوورەوە 23% زیادی کردووە و لەنیوەی یەکەمی ئەمساڵیشدا 40 هەزار ئۆتۆمبێل ڕاستەوخۆ لەو سێ وڵاتەوە هاوردەکراون، لەو ژمارەیەش 18 هەزار ئۆتۆمبێلیان چینیی بوون.

 

وێنە گەورەکە: لە بازاڕەکانی هەرێمی کوردستان و عێراق، ئۆتۆمبێلی ژاپۆنی، کۆری و چینیی خواستێکی زۆرییان لەسەرە و بەهۆی هەرزانی نرخەکەشی بەراورد بە ئۆتۆمبێلەکانی دیکە، ماوەیەکە خواست لەسەر ئۆتۆمبێلی چینیی تا دێت زیاتر دەبێت.

 

لێدوانی فەرمی: مەنار عوبەیدی، سەرۆکی دامەزراوەی عێراقی ئایندە بۆ لێکۆڵینەوەی ئابووری لە شیکارییەکدا ئەوەشی خستووەتەڕوو، لە نیوەی یەکەمی ئەمساڵدا بە بەهای 903 ملیۆن دۆلار، 39 هەزار و 704 ئۆتۆمبێل لە چین، ژاپۆن و کۆریای باشوورەوە هاوردەکراون، لەکاتێکدا لەنیوەی یەکەمی ساڵی ڕابردوو تەنیا 32 هەزار و 500 ئۆتۆمبێل لەو سێ وڵاتە بەشێوەی ڕاستەوخۆ هاوردەکرابوون.

 

ئەو شارەزایەش دەشڵێت، لەو نزیکەی 40 هەزار ئۆتۆمبێلەی لە نیوەی یەکەمی ئەمساڵدا هاوردەکراون، 18 هەزاریان چینین لەکاتێکدا لە نیوەی یەکەمی ساڵی ڕابردوودا تەنیا 10 هەزار و 500 ئۆتۆمبێل هاوردەکرابوون، ئەوەش مانای وایە هاوردەکردنی ئۆتۆمبێلی چینیی بەڕێژەی 75% بەرزبووەتەوە.

 

وەک مەنار عوبەیدی باسی دەکات تێکڕای نرخی ئۆتۆمبێلێکی چینیی هاوردەکراو بۆ عێراق 13 هەزار و 300 دۆلارە، بەڵام تێکڕای نرخی ئۆتۆمبێلێکی کۆری 26 هەزار و 500 دۆلارە، تێکڕای نرخی ئۆتۆمبێلێکی ژاپۆنی هاوردەکراویش لە عێراق، لە ئۆتۆمبێلی دوو وڵاتەکەی دیکە بەرزترە و دەگاتە 34 هەزار و 500 دۆلار.