زیاتر لە 290 سکاڵا دژی عەجاج تۆمار کرا

ئاڤا نیوز

ئەمڕۆ دوایین وادە بوو بۆ وەرگرتنی سکاڵا دژی عەجاج، ئەو تۆمەتبارەی کە لە زیندانی نوگرە سەلمان بەرپرسیارێتی ئەشکەنجە و ئەنفالی کوردی جێبەجێ دەکرد. لە گەرمیان بۆ گوزارشت لە ژمارەی ئەنفالکراوان 182 سکاڵا تۆمار کراون.

وێنە گەورەکە: بەڕێوەبەرایەتیی گشتی کاروباری شەهیدان و ئەنفالکراوان لە ڕۆژی 4ـی ئەم مانگەوە ماوەی پێنج ڕۆژی دیاریکرد بۆ پڕکردنەوەی فۆرمی سکاڵا لە دژی عەجاج ئەحمەد حەردان. ئەمڕۆ شەممە دوایین وادە بوو.

لێدوانی فەرمی: دێکان گەرمیانی، ئەندامی لیژنەی باڵا لە کۆمەڵەی داکۆکیکردن لە مافی کەسوکاری ئەنفالکراوان بە ئاڤا میدیای وت، ئەمڕۆ کاتژمێر 4 دوایین وادە بوو بۆ پڕکردنەوەی فۆرمی سکاڵا.

- لە چەمچەماڵ 75 سکاڵا، لە گەرمیان 182 سکاڵا وەک گوزارشت لە 182 هەزار ئەنفالکراو، لە ئەمنە سوورەکەی سلێمانیش 35 سکاڵا تۆمار کراون. بە کۆی گشتی 292 سکاڵا تۆمار کراوە.

لەلایەکی دیکەوە: کامەران مستەفا، بەڕێوەبەری شەهیدان و ئەنفالکراوانی هەڵەبجە بە ئاڤا میدیای ڕاگەیاند، هەموو ئەوانەی لە سنووری هەڵەبجە سکاڵایان دژی عەجاج هەبوو، نێردران بۆ ئەو لیژنەیەی لە ئەمنە سوورەکەی سلێمانی دانیشتبوو. سەرۆکایەتی کۆمار پارێزەری بۆ گرتوون.

ئەوەی پێویستە بیزانیت: عەجاج یەکێک بوو لەو 56 کەسەی کە لە دوای 2003 لەناو لیستی داواکراوی ئەمریکییەکان بوو، ناوی لەگەڵ سەدام حوسێن و عەلی حەسەن مەجید و دارودەستەکەی ڕژێمی پێشوو هاتبوو، بۆیە ئەم کەیسە لەبەردەستی دادگای باڵای تاوانەکانە و سکاڵاکان دەچن بۆ ئەو دادگایە.

باکگراوند: ڕۆژی 1ـی ئابی ئەمساڵ دەزگای ئاسایشی نیشتمانی عێراق، لە پارێزگای موسەننا بە هەماهەنگی لەگەڵ ئاسایشی باشووری پارێزگای سەڵاحەددین، توانییان عەجاج ئەحمەد حەردان ناسراو بە (عەجاجی نوگرە سەلمان) دەستگیر بکەن. لە هەرێمی کوردستان ڕێکاری تۆمارکردنی سکاڵا دەستیپێکردووە.