دوو کەس بە تۆمەتی کوشتنی بزنی کێوی لە ئامێدی دەستگیرکران

ئاڤا نیوز

لە قەزای ئامێدی دوو کەس بە تۆمەتی کوشتنی بزنی کێوی دەستگیرکران و پۆلیسیش لەوبارەیەوە وتی، "لێکۆڵینەوەکانمان دەستیپێکردووە و بەردەوام دەبین".

چیرۆکی سەرەکی: ئێوارەی ڕۆژی دووشەممە 11-8-2025، لە چیای مەتینای سنووری قەزای ئامێدی چەند ڕاوچییەک سێ بزنی کێوی دەکوژن و دوای گەیشتنی هێزی ژینگە بە شوێنی تەقەکردنەکە، ڕواچییەکان ڕایان کردووە، لاشەی بزنە کێوییەکانیشیان بەجێهێشتووە.

لێدوانی فەرمی: عەمید جەمال سەعدۆ، فەرماندەی هێزی پاراستنی ژینگەی دهۆک بە ئاڤای ڕاگەیاند، لێکۆڵینەوەکانمان لەسەر کوشتنی ئەو بزنە کێوییانە دەستی پێکردووە، دوو تۆمەتباریش لەسەر ئەو بابەتە دەستگیر کراون.

عەمید جەمال سەعدۆ ئاماژەی بەوەکرد، "بەهۆی ڕێکارەکانی ژینگەپارێزی و بڵاوکردنەوەی هۆشیاری، ئاژەڵانی کێوی ترسیان لە مرۆڤ کەمبووەتەوە و بەردەوام دێنە نزیک خاڵەکانی چاودێری هێزی پاراستنی ژینگە، ڕاوکردن و کوشتنی ئاژەڵی کێوی لەو سنوورە زۆر کەمی کردووە و هەرکەسێکیش سەرپێچی بکات ڕووبەڕووی دادگای دەکەینەوە".

فەرماندەی هێزی پاراستنی ژینگەی دهۆک وتیشی، "دوو ساڵ پێش ئێستا کەسێک بزنێکی کێوی کوشت، کەسەکە دۆزرایەوە و ڕەوانەی داگا کرا و بە پێبژاردنێکی زۆر سزا درا"

لە لایەکی دیکەوە: سەنعان عەبدوڵڵا، وتەبێژی دەستەی پاراستن و چاککردنی ژینگەی هەرێمی کوردستان بە ئاڤای ڕاگەیاند: ڕاوکردنی بزنی کێوی بەهەموو جۆرێک قەدەغەیە و هەرکەسێک سەرپێچی بکات ڕێکاری یاسایی بەرامبەر دەگیرێتە بەر.

ئەوەی پێویستە بیزانیت: بەپێی یاسا و ڕێنماییە بەرکارەکان لە هەرێمی کوردستان، هەر کەسێک بزنی کێوی ڕاوبکات بە پێبژاردنی 10 ملیۆن دینار سزا دەدرێت.