منارەی چۆلی لە هەولێر نۆژەن دەکرێتەوە و کامێرای چاودێری بۆ دادەنرێت

ئاڤا نیوز

منارەی چۆلی لە شاری هەولێر نۆژەندەکرێتەوە و کامێرای چاودێریش لە دەورووبەری منارەکە دادەنرێت.

وێنە گەورەکە: هەولێر خاوەن مێژوویەکی کۆنە و شوێنەوارە دێرینەکانی وەک قەڵات و منارەی چۆلی، جوانییەکی زیاتری بە شارەکە بەخشیوە، بە مەبەستی پاراستنی ئەم میراتە مێژووییەش، بڕیارە بەم نزیکانە دەست بە نۆژەنکردنەوەی منارەی چۆلی بکرێت، کە یەکێک لە شوێنەوارە دێرینەکانی هەولێر و بە یەکێک لە منارە دەگمەنەکانى ناوچەکە و جیهان دادەنرێت.

بڵاوکراوەی فەرمی: پەڕەی فەرمیی پارێزگای هەولێر لە فەیسبووک بڵاویکردەوە، کە تیمێکی شارەزای وڵاتی چیک لێکۆڵینەوەی وردیان لە بارەی منارەکە کردووە و کەموکوڕییەکانیان بۆ نۆژەنکردنەوە دەستنیشان کردووە، هەمان تیم 17 ساڵ لەمەوبەر کاری نۆژەنکردنەوەیان بۆ منارەکە کردووە.

ژمارەکان وا دەڵێن: کاری نۆژەنکردنەوەکەی منارەی چۆلی بریتى دەبێت لە:

- گۆڕینی شوورەی منارەکە.

- پڕکردنەوەی کەلێنەکان و چەندین گۆڕانکاری دیکە.

- دانانی کامێرای چاودێری لە دەورووبەری.

باکگراوند: منارەی چۆلی کە مێژووەکەی بۆ سەردەمی فەرمانڕەوایی سوڵتان موزەفەرەدین کۆکبری (1190 - 1232زایینی) دەگەڕێتەوە، دەکەوێتە باشووری ڕۆژئاوای قەڵای هەولێر و یەکێکە لە سیمبولە دیارەکانی شارەکە، دوو دەرگا و دوو پلیکانەی جیاوازی هەیە بۆ سەرکەوتن، ئەمەش یەکێکە لە تایبەتمەندییە ناوازەکانی. بەرزیی منارەکە نزیکەی 37 مەترە، بەهۆی ئەوەی بۆ ماوەیەکی زۆر دەوروبەری چۆڵەوانی بووە، بە "منارەی چۆلی" ناسراوە.