لە کۆبوونەوەی چوارچێوەی هەماهەنگی باسی مووچەی فەرمانبەران کراوە؟

چوارچێوەی هەماهەنگی لە ڕاگەیێنراوێکدا جەختی کردەوە، عێراق پەیوەندییەکانی لەگەڵ وڵاتانی ئەندام لە هاوپەیمانیی نێودەوڵەتیی بەرەنگاربوونەوەی داعش بۆ پەیوەندیی هاوبەشی دوولایەنی کردەوە.

وێنە گەورەکە: چوارچێوەی هەماهەنگی کۆبوونەوەی ئاسایی خۆی بە ئامادەبوونی محەممەد شیاع سوودانی، سەرۆکوەزیرانی عێراق ئەنجامدا، بۆ تاوتوێکردنی چەند پرسێکی ناوخۆیی و نێودەوڵەتی. 

ڕاگەیێنراوی فەرمی: لە ڕاگەیێنراوی چوارچێوەکەدا هاتووە، ئیرادەی خۆمان دووپاتکردەوە بۆ بەردەوامبوون لە ئامادەکارییەکان بۆ هەڵبژاردنی داهاتووی پەرلەمان و ئەنجامدانی لە وادەی دیاریکراو بەپێی ماوەی دەستووری".

 

چاوەرچێوەکە چاودێریی پێشهاتەکانی پەیوەست بە پرسی ئاو دەکات و پاڵپشتی خۆی بۆ پابەندبوونی عێراق بە ڕێککەوتنە ستراتیژییەکان و لێکتێگەیشتنە هاوبەشەکان.

پەیوەست بە کۆتایی هاتنی ئەرکی هاوپەیمانان، چوارچێوەی هەماهەنگی جەختی لەسەر گرنگی گواستنەوە بۆ هاوبەشی دوولایەنەی لەگەڵ وڵاتانی پەیوەندیدار کردەوە، بەمەبەستی بەرزکردنەوەی سەقامگیری عێراق و پێگەی ناوچەیی".

لێدوانی فەرمی: سەبارەت بە پرسی ناردنی مووچەی مووچەخۆران و هەناردەکردنەوەی نەوتی هەرێمی کوردستان بۆ دەرەوە، سەلام زوبەیدی، وتەبێژی هاوپەیمانیی نەسر کە حەیدەر عەبادی، سەرۆکوەزیرانی پێشوو سەرۆکایەتیی دەکات و بەشێک لە چوارچێوەی هەماهەنگی بۆ ئاڤا میدیا ڕەتیکردەوە ئەو پرسانە تاوتوێ کرابن. لە کاتێکدا دوێنێ دووشەممە، موعین کازمی، پەرلەمانتاری چوارچێوەی هەماهەنگی بە ئاڤا میدیای ڕاگەیاندبوو، "ئەگەری هەیە پرسی ناردنی مووچەی مووچەخۆران و هەناردەکردنەوەی نەوتی هەرێمی کوردستان لە ڕێگەی بەندەری جەیهانی تورکیاوە تاوتوێ بکرێت، تەنانەت ئەگەر لە پەراوێزی کۆبوونەوەکەش بێت".

 

ئەوەی پێویستە بیزانیت: بەپێی ڕێککەوتنی نێوان عێراق و ئەمریکا، مانگی داهاتوو ئەرکی هاوپەیمانی نێودەوڵەتی دژی داعش لە بارەگای سەرەکییان لە بەغدا و بنکەی عەین ئەسەد لە ڕۆژئاوای وڵاتەکە کۆتایی دێت، ئەیلولی ساڵی 2026یش لە هەموو عێراق و هەرێمی کوردستان ئەرکەکانیان بەتەواوی کۆتایی دێت.