وەزارەتی نەوتی عێراق بۆ ئاڤا: لە زووترین کات هەناردەی نەوتی کوردستان دەستپێدەکاتەوە

ئاڤا نیوز

وەزارەتی نەوتی عێراق دووپاتی دەکاتەوە ڕێکارە هونەرییەکان تەواو بووە و لە زووترین کاتدا هەناردەکردنەوەی نەوتی هەرێمی کوردستان دەستپێدەکاتەوە.

وێنە گەورەکە: دوای پەسەندکردنی لێکتێگەیشتنی نێوان حکومەتی هەرێمی کوردستان و حکومەتی عێراق، هەردوولا ڕێککەوتن لەسەر دووبارە هەناردەکردنەوەی نەوتی هەرێمی کوردستان و بەبازاڕکردنی لە ڕێگەی کۆمپانیای سۆمۆوە، ئەم دۆسیەیە ڕێککەوتنی کۆتایی لەسەر کراوە و هیچ بەربەستێکی لەبەردەم نەماوە.

لێدوانی فەرمی: سەرچاوەیەک لە وەزارەتی نەوتی عێراق بە ئاڤای گوت: هەموو ڕێکارە هونەرییەکانی هەناردەکردنەوەی نەوتی هەرێمی کوردستان تەواو کراون و لە زووترین کات هەناردەکردنەوەی نەوت دەستپێدەکاتەوە.

زانیاریی پەیامنێر: دەروون مەلا ناجی، پەیامنێری ئاڤا میدیا لە بەغدا گوتی: لەگەل کۆمپانیای سۆمۆ و وەزارەتی نەوتی عێراق قسەم کردووە، بۆ هەناردەکردنەوەی نەوتی هەرێمی کوردستان هەموو شتێک تەواو بووە، ئەوەی ماوەتەوە تەنیا کاروباری رێکخستنە، ئەویش چەند ڕۆژێکی کەمی پێویستە و لە چەند رۆژی داهاتوو نەوت هەناردە دەکرێتەوە.

زانیاریی زیاتر: هەفتەی داهاتوو شاندێکی هەرێمی کوردستان تایبەت بە هەناردەکردنەوەی نەوتی هەرێمی کوردستان سەردانی بەغدا دەکات، بۆ تەواوکردنی هەنگاوەکانی ئەم پرۆسەیە.

ئەمەش بزانە: تورکیا ڕەزامەندی نیشانداوە نەوتی هەرێمی کوردستان لە رێگەی بەندەری جەیهان هەناردە بکرێتەوە.