نوێترین زانیاریی لەبارەی ڕێگەی ستراتیژیی هەولێر - گۆمەسپان

ئاڤا نیوز

 

کارەکانی پرۆژەی ڕێگای هەولێر - گۆمەسپان 30٪ تەواو بوون، دیزاینی پرۆژەکە بەو جۆرە کراوە، هیچ هەوراز و نشێوی و چەمانەوە لەو ڕێگایەدا نامێنێت.

 

وێنە گەورەکە: ڕێگای هەولێر - گۆمەسپان، ڕێگایەکی ستراتیژیی گرنگە، هەولێر دەبەستێتەوە بە چواریانی گۆمەسپان، درێژیی ڕێگاکە 16 کیلۆمەترە و دوو سایدە، هەر ئاراستەیەکی سایدەکان پانی 10.75مەترە و لە دوو ڕێڕەو لەگەڵ ڕێڕەوی فریاگوزاری پێکهاتووە.

 

چیرۆکی سەرەکی: پرۆژەکە لە 6/14/2025 دەستی بەکارەکانی کردووە، لە هەموو بەشەکانی کارکردن بەردەوامە و چی گرد و بەرزایی هەیە ئەبڕن و چی نزمایی و ڕێڕەوی باران هەیە پردی لەسەر دروست دەکرێت، بۆ ئەوەی ڕێگایەکی دوو سایدی تەختی لەسەر دروست بکرێت.

 

لێدوانی فەرمی: ئەندازیار ئەمیر عەبدولخالق، بەڕێوەبەری پرۆژەکانی ڕێگاوبان لە هێمن گروپ بە ئاڤا میدیای گوت، دیزاینی پرۆژەکە بەم جۆرە کراوە جیاواز لە ڕێگا کۆنەکە هیچ بەرزایی و نزمایی و چەمانەوەی ناڕێکی تێدا نابێت، بەشێوەیەک بە درێژایی ڕێگاکە خێرایی 100 کیلۆمەتر لە کاتژمێرێکدا دەبێت، ئێستا لە هەموو بەشەکانی پرۆژەکە کارکردن بەردەوامە و 30٪ کارەکانی تەواو بووە.

 

زانیاریی زیاتر: پرۆژەی ڕێگای هەولێر – گۆمەسپان ئەم بەشانەی لەخۆگرتووە: 

-  50 ئاوبەری سندووقی بە درێژی و قەبارەی جیاواز. 
-  شەش بەرزە پرد.
-  یەک ژێرپرد.
- بە سێ چین قیرتاو بە ئەستووریی 21 سانتیمەتر، دوو چین بەردی شکاو بە ئەستووریی 30 سانتیمەتر، دوو چین تێکەڵە بە ئەستووریی 40 سانتیمەتر.

 

گۆشەیەکی دیکەی دیمەنەکە: ڕێگاکە گشت پێکهاتە و بەشەکانی دیکەی وەک سیستمی ئاوەڕۆ، دیواری پاڵپشت، پرژینی خۆپاراستن، هێماکانی هاتووچۆ و هێڵکاری لەخۆدەگرێت.

 

ئەمەش بزانە: 600 ئامێری جۆراوجۆر لە دروست کردنی ڕێگاکە بەکاردەهێنرێن، دوو هەزار کرێکاریش کار لە پرۆژەکە دەکەن کە هەر هەموویان دەستی کاری ناوخۆن.

 

بۆچی گرنگە: ئەم ڕێگایە یەکێک لە دەروازە سەرەکییەکانی شاری هەولێر و بەشێکە لە ڕێگای سەرەکی هەولێر - کۆیە، هاوکات بەشێکە لە ڕێگای سەرەکی هەولێر - ئیدارەی ڕاپەڕین و هەولێر – سلێمانی، بە تەواوبوونی کارئاسانی زۆر بۆ هاتووچۆی هاونیشتمانیان، گەشتیاری و بازرگانی دەکات.