فەڕەنسا پێشنیازی کۆبوونەوەی دیمەشق و هەسەدە لە هەرێمی کوردستان دەکات

ئاڤا نیوز

 

میدیای سووریا دەڵێت، وەزارەتی دەرەوەی فەڕەنسا پێشنیازی بۆ هەردوو حکومەتی سووریا و هێزەکانی سووریای دیموکرات (هەسەدە) کردووە لەجێگەی پاریس، گفتوگۆکانیان لە ئوردن، سعودییە یانیش هەرێمی کوردستان درێژە پێبدەن.

 

وێنە گەورەکە: 8-8-2025 لە شاری حەسەکەی ڕۆژئاوای کوردستان کۆنفرانسی پێکهاتەکان بەڕێوەچوو و تیایدا جەخت لە داواکاریی سووریایەکی ناناوەندی کرایەوە، لە کاردانەوەی ئەم کۆنفرانسەش دیمەشق گفتوگۆکانی لەگەڵ هەسەدە لە پاریس هەڵوەشاندنەوە و ڕایگەیاند، ئەم کۆنگرەیە لێدان بوو لە گفتوگۆکان و دەبێت هەسەدە لە دیمەشقەوە بەشێوەیەکی جددی کار بۆ ڕێککەوتنی 10ی ئازار بکات.

 

زانیاریی بەدەستهاتوو: کەناڵی سووریای نزیک لە حکومەتی دیمەشق لە سەرچاوەیەکی ئاگادارەوە بڵاویکردەوە، وەزارەتی دەرەوەی فەڕەنسا پێشنیازیکردووە کۆبوونەوەی نێوان حکومەتی سووریا و هەسەدە لە پاریسەوە بۆ وڵاتێکی عەرەبی لەوانەش ئوردن یان سعودیە یانیش هەرێمی کوردستان بگوازرێتەوە، هاوکات پێشنیازیشی کردووە لیستی وڵاتانی گەرەنتیکار بۆ ڕێککەوتنی دیمەشق و هەسەدە فراوان بکرێت و وڵاتانی عەرەبی و هەرێمی بۆ زیاد بکرێت، لەوانەش تورکیا.

 

سەرچاوەکە دەڵێت، حکومەتی سووریا پێداگرە لەسەر بەڕێوەچوونی گفتوگۆکان لە دیمەشق چونکە کێشەکەی لەگەڵ هەسەدە بە کێشەیەکی ناوخۆیی وڵاتەکە دەزانێت.