کاردانەوەی وڵاتان لەسەر هێرشەکەی ئیسرائیل بۆ سەر باڵیۆزخانەی ئێران لە دیمەشق

ئاڤا نیوز 

هێرشەکەی ئیسرائیل بۆ سەر باڵیۆزخانەی ئێران لە دیمەشق، کاردانەوەی بەشێک لە وڵاتانی لێکەوتەوە و سەرکۆنەی دەکەن، ئەمریكاش ڕایگەیاند بە وردی هەڵسەنگاندنی بۆ دەكەن.

وێنە گەورەکە: بەشێک لە وڵاتان سەرکۆنەی بۆردوومانەکەی ئەمڕۆی شاری دیمەشقی سووریا دەکەن کە باڵیۆزخانەی ئێرانی کردە ئامانج و کوژرانی هەشت ئەفسەر و دیپلۆماتکاری ئێرانی لێکەوتەوە.

ڕاگەیێنراوە فەرمییەکان: 

ڕووسیا: ئێمە بە تووندی سەرکۆنەی ئەم هێرشە قبوڵنەکراوە بۆ سەر نوێنەرایەتی کونسوڵگەریی ئێران لە سووریا دەکەین، هیچ هێرشێک بۆ سەر بارەگایەکی دیپلۆماسی “قبووڵ ناکرێت”.

ئیمارات: سەرکۆنەی هێرشەکەی ئیسرائیل بۆ سەر باڵیۆزخانەی ئێران لە سوریا دەکەین و داوای ڕاگرتنی هێرشەکان دەکەین.

سووریا: ئێمە بە تووندی سەرکۆنەی ئەم هێرشە تیرۆریستییە قێزەونە دەکەین، کە بینای باڵێۆزخانەی ئێرانی لە دیمەشق کردە ئامانج و بووەهۆی شەهیدبوونی ژمارەیەک کەسی بێتاوان.

کۆشکی سپی: ئاگاداری هێرشەکەی ئەمڕۆی دیمەشقین و بە وردی هەڵسەنگاندنی بۆ دەکەین.

لەلایەکی دیکەوە: بزووتنەوەی حەماس هاوسۆزی تەواوی خۆی لەگەڵ ئێران و سوریا لە بەرامبەر هێرشەکە دەڕبڕی.

باکگراوند: کاتژمێر پێنجی ئێوارەی ئەمڕۆ، فڕۆکەکانی ئیسرائیل باڵیۆزخانەی ئێرانیان لە سووریا بۆردوومانکرد، محەممەد ڕەزا زاهیدی، یەکێک لە سەرکردەکانی فەیلەقی قودسی سوپای پاسداران و حەوت سەرکردە و ڕاوێژکاری دیکەی ئێرانییان کوشت.