شێخ دارا: بارانبارینی لاواز چەند وڵاتێکی ناوچەکەی گرتووەتەوە

ئاڤا نیوز

بەهۆی کاریگەری ئەو شەپۆلە بایەی کە لە جەمسەری باکوورەوە هەڵیکردووە، بارانێکی لاواز وڵاتانی ناوچەکەی گرتووەتەوە و کاریگەریشی لەسەر هەرێمی کوردستان هەیە.

لێدوانی فەرمی: شێخ دارا، پێشکەشکاری کەشوهەوای ئاڤا میدیا ڕایگەیاند، لە سەرەتای مانگی نۆ ئاماژەم بەوە دابوو کە کاریگەریی شەپۆلی جەمسەری باکوور هەرێمی کوردستان دەگرێتەوە، ئێستاش بەهۆی کاریگەری ئەو شەپۆلە بایە، بارانێکی لاواز ناوچەکەی گرتووەتەوە.

بەپێی پێشبینییەکانی کەشوهەوا، ڕۆژی شەممە ئەو شەپۆلە نزیک دەبێتەوە و بەهۆی شێی دەریای سپیی ناوەڕاست هەوری ناوخۆیی لە هەرێمی کوردستان دروست دەبێت، بۆ شەوەکە پلەکانی گەرما زیاتر نزم دەبنەوە.

لەلایەکی دیکەوە: شێخ دارا ئاماژە بەوەش دەکات، ئەو بایەی لە ڕۆژئاواوە هەڵیکردووە، هەرێمی کوردستانیشی گرتووەتەوە کە خۆڵبارینی لەگەڵدایە، بە تایبەت لە ناوچەکانی گەرمیان، بەڵام ناوچەکانی خوارووی عێراق زیاتر گرتووەتەوە.

شێخ دارا دەڵێت، ئەمساڵ بارانێکی زۆر دەبارێت و لە ناوەڕاستی مانگی 11 ئەگەر هەیە پەڵە بدات، هەروەها بەفربارینێکی چڕ و سەختیش هەرێمی کوردستان دەگرێتەوە.

ئەوە پێویستە بیزانت: پلەکانی گەرمای شار و شارۆچکەکان بەم شێوەیەیە:

- هەولێر: بەرزترین 36 و نزمترین 27 پلەی سیلیزییە.

- سلێمانی: بەرزترین 36 و نزمترین 24 پلەی سیلیزییە.

- کەرکووک: بەرزترین 40 و نزمترین 27 پلەی سیلیزییە.

- دهۆک: بەرزترین 32 و نزمترین 18 پلەی سیلیزییە.

- هەڵەبجە: بەرزترین 37 و نزمترین 28 پلەی سیلیزییە.

- زاخۆ: بەرزترین 36 و نزمترین 22 پلەی سیلیزییە.

- سۆران: بەرزترین 33 و نزمترین 18 پلەی سیلیزییە.

- ڕاپەڕین: بەرزترین 36 و نزمترین 22 پلەی سیلیزییە.

- گەرمیان: بەرزترین 41 و نزمترین 27 پلەی سیلیزییە.

- ئاکرێ: بەرزترین 34 و نزمترین 20 پلەی سیلیزییە.

- پێنجوێن: بەرزترین 32 و نزمترین 17 پلەی سیلیزییە.

ئەمەش بزانە: هەرێمی کوردستان کاریگەریی شەپۆلی جەمسەری باکووری لەسەرە کە هەوایەکی فێنک و خۆش ڕووی تێدەکات. هاوکات، کاریگەریی باشووریشی لەسەرە کە لە کەنداوەوە بەرەو هەرێمی کوردستان دێت و بای گەرم و وشکە، هەروەها هەرێمی کوردستان کاریگەریی دەریای سپیی ناوەڕاستیشی لەسەرە و زۆرترین بارانبارین لەو ئاراستەیە ڕوو دەکاتە کوردستان، بەڵام کاریگەریی ڕۆژهەڵات بەراورد بە ئاراستەکانی تر کەمترە.