لە هەرێمی كوردستان خۆڵبارین چڕدەبێتەوە و پلەكانی گەرما نزم دەبنەوە

ئاڤا نیوز

شەپۆڵێكی چڕی خۆڵبارین و ڕەشەبا ناوچە جیاجیاكانی هەرێمی كوردستانی گرتووەتەوە و پلەكانی گەرماش چەند پلەیەك دابەزیون، كەشناسیی هەرێمیش هاووڵاتیان لە بەرزی ڕێژەی تۆز و خۆڵ ئاگادار دەكاتەوە.

چیرۆكی سەرەكی: ڕەشەبا و تۆز و خۆڵ كە لە ناوچەكانی ڕۆژئاوای هەرێمی كوردستانەوە سەرچاوەی گرتووە، ڕووی لە شارەكانی هەرێمی كوردستان كردووە و تا دێت ئاستی خۆڵبارین چڕتر دەبێتەوە و مەودای بینینی ئاسایی كەمتر دەبێتەوە و كاریگەرییەكەی بەسەر ناوچەكانی هەرێمی كوردستان تا سبەی نیوەڕۆ دەمێنێتەوە.

ئەوەی پێشبینی دەكرێت: بەپێی ڕاگەیێنراوێكی فەرمیی بەڕێوەبەرایەتیی كەشناسی و بوومەلەرزەزانی هەرێمی كوردستان، سبەی لە هەرێمی كوردستان ئاسمان ساماڵ دەبێت، لەگەڵ بەردەوامیی بەرزبوونەوەی تۆز و خۆڵ تاوەكو كاتەكانی نیوەڕۆ پاشان كەشەكە سەقامگیر دەبێت و پلەكانی گەرماش بە گشتی نزیكەی سێ پلە بەراورد بە ئەمڕۆ هەینی زیاد دەبن.

لەلایەکی دیکەوە: شێخی كەشناسی، شێخ دارا، پێشكەشكاری كەشوهەوای ئاڤا میدیا پێشبینی كرد ڕۆژانی هەینی و شەممە، شەپۆڵێكی خۆڵبارین هەرێمی كوردستان بگرێتەوە و ڕۆژی هەینی چڕییەكەی زیاترە و سبەی شەممە بەرە بەرە كەم ببێتەوە.

شێخ دارا ئاماژەی بەوەشكرد، بەپێی پێشبینییەكان ئەمساڵ باران پێش وادەی خۆی دەبارێت و ئەگەری زۆر هەیە لە 15ـی 11، هێندە باران ببارێت پەڵە بدات.

ڕاگەیێنراوی فەرمی: بەپێی نوێترین داتای بەڕێوەبەرایەتیی كەشناسیی هەرێمی كوردستان، ئەمڕۆ بەرزترین پلەی گەرما لە ئیدارەی گەرمیان تۆماركراوە كە 38 پلە بووە و نزمترینیش لە حاجی ئۆمەران بووە كە 25 پلەی سیلیزییە.

زانیاریی زیاتر: پلەكانی گەرما لە شارەکانی هەرێمی کوردستان بەم شێوەیە دەبێت:

هەولێر 33 پلە

دهۆك 33 پلە 

سلێمانی 33 پلە

هەڵەبجە 36 پلە

كەركووك 36 پلە

ئیدارەی سەربەخۆی سۆران 32 پلە

ئیدارەی زاخۆ 34 پلە

ئیدارەی ڕاپەڕین 35 پلە