ئەفسەرێکی پێشووی عێراق: ڕووسیا لەبارەی بەئامانجگرتنی گرووپە چەکدارەکان لەلایەن ئەمریکاوە عێراقی ئاگادار کردووەتەوە

ئاڤا نیوز

ئەفسەرێکی پێشووی عێراقی ڕایدەگەیێنێت، باڵیۆزی ڕووسیا لە بەغداد پەیامی بە حکومەتی عێراق گەیاندووە لەوانەیە چەند هەفتەی داهاتوو ئەمریکا لە سەرکردەی گرووپە چەکدارەکان یان بارەگاکانیان بدات.

چیرۆکی سەرەکی: چوارشەممەی هەفتەی ڕابردوو، وەزارەتی دەرەوەی ئەمریکا، هەر یەک لە بزووتنەوەی نوجەبا، کەتائیبی سەیید شوهەدا، بزووتنەوەی ئەنساروڵڵا ئەوفیا و کەتائیبی ئیمام عەلی، وەک "ڕێکخراوی تیرۆریستیی بیانی" دەستنیشان کرد.

لێدوانی ڕۆژنامەوانی: سەیف ڕەعد، شارەزای ئەمنی و ئەفسەری پێشوو لە عێراق لە دیداریکی تەلەڤزیۆنی ڕایگەیاند: حکومەت دوێنی کۆبوونەوەی لەگەڵ فەرماندەی دەزگا ئەمنییەکان کردووە لەبارەی ئەوەی چۆن مامەڵە لەگەڵ ئەو بڕیارەی واشنتن و ترەمپ بکەن دوای ئەوەی چوار گرووپی عێراقی خستە لیستی تیرۆرەوە، ئەو گرووپانە نوێنەرایەتی کەسانێک لە پەرلەمان و وەزارەتەکان دەکەن، هاوکات سەدان هەزار چەکداریان لە ڕیزەکانی دەستەی حەشدی شەعبی هەیە. حکومەت ترسی لەوە هەیە ئێستا کە مووچە بەو گرووپانە دەدات دواتر بە پشتیوانیکردنی تیرۆر تۆمەتبار بکرێت.

لەهەمان کاتدا: بە بڕوای سەیف ڕەعد، پۆلێنکردنی ئەو گرووپانە بە گرووپی تیرۆریستی، مانای هەڵکردنی گلۆپی سەوز دێت بۆ دەستپێکردنی ئۆپەراسیۆن لە دژیان، ڕەنگە لە هەر ساتێک بێت ئەو گرووپانە بە ئامانج بگیرێن، پێموایە پەیامەکە لە ڕووسیاوە گەیشتووە، لەلایەن باڵیۆزی ڕووسیا لە بەغداوە، کە لەوانەیە لەم هەفتەیە یان هەفتەی داهاتوودا ئۆپەراسیۆن ئەنجامبدرێت دژی سەرکردایەتی و بارەگاکانیان.

ئەوەی پێویستە بیزانیت: سێشەممەی ڕابردوو، سێرگی شۆیگۆ، سکرتێری ئەنجوومەنی ئاسایشی نیشتمانیی ڕووسیا، لە بەغدا بە جیا لەگەڵ محەممەد شياع سوودانی، سەرۆکوەزیران، سابت عەباسی، وەزیری بەرگری، قاسم ئەعرەجی، ڕاوێژکاری ئاسایشی نیشتمانی و عەلی ناسر، ڕاوێژکاری سەرۆکوەزیرانی عێراق بۆ کاروباری ئاسایشی نیشتمانی کۆبووەوە.