80ـەمین خولی کۆمەڵەی گشتی نەتەوەیەکگرتووەکان بەڕێوەدەچێت

ئاڤا نیوز

ئەمڕۆ دووشەممە بە بەشداری چەندین سەرۆک و سەرکردەی باڵای وڵاتان لە بارەگای نەتەوەیەکگرتووەکان لە نیویۆرک، 80 ـەمین خولی کۆمەڵەی گشتیی نەتەوەیەکگرتووەکان بەڕێوەدەچێت.

چیڕۆکی سەرەکی: لە ژێر دروشمی "پێکەوە باشترین" ڕۆژانی 23 بۆ 29 ئەیلوول 2025 کۆبوونەوەی کۆمەڵەی گشتیی نەتەوەیەکگرتووەکان لە بارەگای سەرەکی لە نیویۆرک هەشتاهەمین خولی خۆی ئەنجام دەدات.

ئەوەی پێشبینی دەکرێت: چەندین سەرۆک و سەرکردەی باڵای جیهان بەشداری لە کۆبوونەوەکەدا دەکەن و لەوانەش هەر یەکە لە ئەحمەد شەرع، سەرۆککۆماری سووریا، ڤۆلۆدیمیر زێلینسکی، سەرۆکی ئۆکراینا، مەسعوود پزیشکیان، سەرۆککۆماری ئێران لەگەڵ چەندین سەرۆک و سەرکردەی دیکە.

ئەوەی لەبارەیەوە دەگوترێت: هەر لەم کۆبوونەوەیەدا سعوودیە و فەرەنسا هاوسەرۆکایەتیی یەکێک لە کۆبوونەوەی کۆمەڵەی گشتیی نەتەوەیەکگرتووەکان دەکەن کە  تایبەت کراوە بە چارەسەری دوو دەوڵەتی بۆ ئیسرائیل و فەڵەستین.

ئەمەش بزانە: نەتەوەیەکگرتووەکان بە فەرمی ڕێگەدەدات مەحموود عەباس سەرۆکی فەڵەستین بە شێوەی ڤیدیۆکۆنفرانس لە کۆبوونەوەکە بەشداری بکات، ئەمەش دوای ئەوەی وەزارەتی دەرەوەی ئەمریکا پێدانی ڤیزای بە بەرپرسانی فەڵەستین ڕاگرت.