حەوتەمین پێشانگەی نێودەوڵەتیی هەولێر بۆ بیناسازی دەکرێتەوە

ئاڤا نیوز

بە بەشداریی زیاتر لە 300 کۆمپانیای ناوخۆیی و نێودەوڵەتی، سبەی حەوتەمین پێشانگەی نێودەوڵەتی بۆ بیناسازی لە شاری هەولێر دەکرێتەوە.

چیرۆکی سەرەکی: بۆ حەوتەم جارە پێشانگای نێودەوڵەتیی هەولێر بۆ بیناسازی و کەرەستە و پێداویستییەکانی بیناسازی بە پشتگیریی حکومەتی هەرێمی کوردستان و بەهەماهەنگیی دەستەی وەبەرهێنان و پێشانگای نێودەوڵەتیی هەولێر دەکرێتەوە.

لێدوانی فەرمی: بەرگەشت ئاکرەیی، وتەبێژی دەستەی وەبەرهێنان بە ئاڤا میدیای ڕاگەیاند، سبەی سێشەممە 23-9-2025، حەوتەمین پێشانگەی نێودەوڵەتیی بیناسازی و كەرەستەی بیناسازی لە هەولێر دەكرێتەوە کە زیاتر لە 300 كۆمپانیای ناوخۆیی و نێودەوڵەتی بەشدار دەبن لە پێشانگەکەدا.

بە وتەی بەرگەشت ئاکرەیی، ئەمساڵ ژمارەیەکی زیاتری کۆمپانیاکان بەشداریی پێشانگەکان دەکەن کە نوێترین براندەكانی بیناسازی لەخۆ دەگرێت و بۆ ماوەی چوار ڕۆژیش بەردەوام دەبێت.

لەلایەکی دیکەوە: هەر لەم مانگەدا شەشەمین پێشەنگای نێودەوڵەتیی هەولێر بۆ وەبەرهێنانی خانووبەرە کرایەوە کە ژمارەیەک کۆمپانیای وەبەرهێنان لەبواری خانووبەرە لە ناوخۆی هەرێمی کوردستان، عێراق، وڵاتانی ناوچەکە و جیهان بەشدارییان تێدا کردبوو.

بۆچی گرنگە: ئەم پێشانگایە دەرفەتێکە بۆ دروستکردنی  پەیوەندی لە نێوان خاوەن پڕۆژەكان و هاووڵاتیان و كۆمپانیاكان کە ساڵانە بە ملیۆنان دۆلار لەنێوانیان واژۆ دەکرێت.