مانگی 10 کارەبای تەواوی ئیدارەی سەربەخۆی سۆران دەکرێت بە 24 کاتژمێری

ئاڤا نیوز

 

قۆناغی یەکەمی ڕێکارە تەکنیکییەکانی جێبەجێکردنی پڕۆژەی ڕووناکی نزیکە لە تەواوبوون، یەک زۆن لە سنووری قەزای سیدەکان ماوە و دوای تەواوبوونی، کارەبای ئەو سنوورە دەکرێت بە 24 کاتژمێری.

 

وێنە گەورەکە: دوای جێبەجێکردنی  پڕۆژەی ڕووناکی لە سەنتەری پارێزگاکان، ئەو پڕۆژە ستراتیژییە بە ئاراستەی ئیدارە سەربەخۆ، قەزا و ناحییەکان فراوان بووە، ئامانجەکە ئەوەیە تاوەکو کۆتایی ساڵی 2026 کارەبای سەرجەم ماڵ و شوێنە بازرگانییەکان ببێتە 24 کاتژمێری بە تێچووی کەمتر و لە ژینگەیەکی پاکتر.

 

لێدوانی فەرمی: ئەردەوان ئیبراهیم، بەرێوەبەری گشتیی کارەبای سۆران بە ئاڤای گوت، "تیمەکانی پڕۆژەی ڕووناکی لە سنووری قەزای سیدەکانن، کارکردن تەنیا لە یەک زۆن ماوە و لەماوەی چەند ڕۆژێکدا تەواو دەکرێت."

 

گوتیشی، "ئەگەر هیچ گرفتێکی تەکنیکی نەیەتە پێش سەرەتای مانگی 10 کارەبای هەر شەش قەزاکەی ئیدارەی سەربەخۆی سۆران، بە ناحییە و گوندەکانییەوە دەکرێت بە 24 کاتژمێری."

 

ئەمەش بزانە: لە سنووری هەر شەش قەزاکەی ئیدارەی سەربەخۆی سۆران 87 هەزار هاوبەش سوودمەند دەبن.