مەسرور بارزانی: بەهۆی کامێراکانی تۆمارکردنی تیژڕۆیی ڕووداوەکانی هاتووچۆ 50% کەمیان کردووە

ئاڤا نیوز

لە کاتی مەراسیمی ناساندنی ڕێبەری سەلامەتی، مەسرور بارزانی، سەرۆکوەزیرانی کوردستان ئاماژەی بە کارایی و کاریگەری دانانی سیستمی کامێراکانی تۆمارکردنی تیژڕۆیی کرد و ڕایگەیاند، ڕووداوەکان بەڕێژەی 50% کەمبوونەتەوە.

وێنە گەورەکە: لەماوەی کارکردنی کابینەی نۆیەمی حکومەتی هەرێمی کوردستان، کاری گەورە کراوە بۆ کەمکردنەوە ئەستەنگی و گرفتەکانی بەردەم کاروباری ڕۆژانەی هاووڵاتیان، لەوچوارچێوەیەشدا لەسەرجەم ڕێگا خێراکان و ڕێگاکانی ناوشاریش کامێرای تیژڕۆی دانراوە بۆ کەمکردنەوەی ڕووداوەکانی هاتووچۆ. 

لێدوانی فەرمی: مەسرور بارزانی، سەرۆکوەزیرانی کوردستان لە مەراسیمی ناساندنی ڕێبەری سەلامەتی وتی، بە دەستپێشخەری وەزارەتی ناوخۆ کامێراکانی تۆمارکردنی تیژڕۆیی دانران و بە بیر و ستراتیژێكی ڕوون دەست بە جێبەجێکردنی کرا. لەو شوێنانەی کە کامێرای تیژڕۆیی دانراون لەماوەی یەک ساڵدا ڕووداوەکانی هاتووچۆ بە ڕێژەی 50% کەمیانکردووە وە مردن و بریندار بوونیش بەڕێژەی %60 کەمبووەتەوە.

ئەوەی پێویستە بیزانیت: ئەمڕۆ یەکشەممە بە سپۆنسەری ئاڤا میدیا مەراسیمی بڵاوکردنەوەی یەکەم ڕێبەری سەلامەتی بڵاوکرایەوە کە حەوت بەرگ لەخۆدەگرێت و وەزارەتی ناوخۆ لەڕێگای لیژنەیەکەوە ماوەی چوار ساڵ خەریکی بووە.