کۆمیسیۆن سێ جۆر سزا بۆ سەرپێچیكارانی بانگەشەی هەڵبژاردن دیاری دەکات

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق سێ جۆر سزا بۆ  ئەگەری سەرپێچیکردن لە بانگەشەی هەڵبژاردنەکان دیاری دەکات، بەرپرسی دەستەی هەڵبژاردنەکانی هەرێمی کوردستان لە کۆمیسیۆنی باڵای هەڵبژاردنەکانی عێراق لەوبارەیەوە دەڵێت 'پێبژاردن لە 100 هەزار دینار دەستپێدەکات تاوەکو 10 ملیۆن دینار'.

وێنە گەورەکە: بەرەبەیانی ڕۆژی هەینی 2025-10-03 بانگەشەی هەڵبژاردنی پەرلەمانی عێراق دەستپێدەکات، لایەنە سیاسییەکانیش ئامادەکارییەکانی خۆیان بۆ ئەو پرۆسەیە کردووە و چاوەڕوانی کاتی دیاریکراو دەکەن.

لێدوانی فەرمی: نەبەرد عومەر، بەرپرسی دەستەی هەڵبژاردنەکانی هەرێمی کوردستان لە کۆمیسیۆنی باڵای هەڵبژاردنەکانی عێراق بە ئاڤای ڕاگەیاند: چەند ڕێنماییەکمان بۆ لایەنە سیاسییەکان و کاندیدەکان دەرکردووە، کە ئەمانەن؛ نابێت بە هیچ شێوەیەک لە نێو دامەزراوە حکومییەکان و شوێنە ئاینییەکان و نزیک بنکەکانی کۆمیسیۆن بانگەشەی هەڵبژاردن بکرێت. هاوکات نابێت ئۆتۆمبێلی حکومی بۆ بانگەشەی هەڵبژاردن بەکاربهێنرێت.

زانیاریی زیاتر: کۆمیسیۆنی باڵای سەربەخۆی هەڵبژاردنەکانی عێراق سێ جۆر سزای بۆ سەرپێچیکاران دیار کردووە، پێبژاردن لە 100 هەزار دینار دەستپێدەکات تا 10 ملیۆن دینار، بەندکردن، هەروەها دوورخستنەوەی کاندید.

ئەوەی پێویستە بیزانیت: سەرەڕای سزاکانی کۆمیسیۆن، هەریەک لە ئەنجوومەنی پارێزگا و دەستەی ژینگە و شارەوانییەکانیش لەلای خۆیانەوە چەندین ڕێنمایی بۆ پاکڕاگرتنی شوێنە گشتییەکان دەردەکەن، بۆ ئەوەی لە کاتی سەرپێچی لە هەڵواسینی فلێکس و پۆستەرەکاندا، سزایان بدەن.