ڕێکاری تایبەت بۆ گەڕانەوەی 41 کۆچبەری کورد لە لیبیا دەگیرێتەبەر

ئاڤا نیوز

زیاتر لە مانگێکە 41 کۆچبەری کورد لە تەرابلوسی لیبیا دەستگیرکراون و ئاڤا میدیا دوایین هەوڵەکان بۆ گەڕانەوەیان ئاشکرا دەکات.

وێنە گەورەکە: لیبیا بووە بە یەکێک لە ڕێڕەوە دیارەکانی گەیشتن بە وڵاتانی ئەوروپا بە ڕێگەی نایاسایی، بەشێک لە گەنجانی هەرێمی کوردستان و وڵاتانی دیکەی ناوچەکە بۆ گەیشتن بە کەناراوەکانی ئیتاڵیا ڕێگای ئەو وڵاتە بەکاردەهێنن، بەڵام لەلایەن هێزە ئەمنییەکان دەستگیر دەکرێن و ڕووبەڕووی دۆخی نەخوازراو و ئەشکەنجەدان و تەنانەت گیانلەدەستدانیش دەبنەوە.

لێدوانی فەرمی: د. ئەحمەد سەحاف، هەڵسوڕێنەری باڵیۆزخانەی عێراق لە لیبیا بە ئاڤای وت: باڵیۆزخانەکەمان هەموو ڕێکارەکانی تایبەتی بۆ گەڕانەوەی ئەو کۆچبەرانە کردووە، پاسپۆرتیان بۆ کراوە تاوەکو بتوانن بگەڕێنەوە، هەماهەنگیی تەواویشمان لەگەڵ فەرمانگەی پەیوەندییەکانی دەرەوەی هەرێمی کوردستان و وەزارەتی دەرەوەی عێراق کردووە.

زانیاریی زیاتر: بە گوتەی د. ئەحمەد سەحاف، هەموو هەولێک بۆ گەڕانەوەی ئەو کۆچبەرانە دراوە، بۆ ئەو مەبەستەش گەرەنتی ئاسایش و سەلامەتییان دەکرێت و بە تەواوی پارێزراو دەبن.

باکگراوند: لە ماوەی ڕابردوو دەیان کۆچبەری کورد هەوڵیان داوە لە لیبیاوە بگەنە ئیتاڵیا و دواتر بڕۆنە وڵاتانی ئەوروپا و بەریتانیا، بەشێکی زۆری ئەو گەنجانە دەستگیرکراون و بێسەروشوێن بوون، ئاڤا میدیا ناو و زانیاریی ئەو کۆچبەرانەی لە زیندانەکانی لیبیادا ئاشکرا کردووە و لەگەڵ لایەنە پەیوەندیدارەکان هەوڵی دۆزینەوە و گەڕاندنەوەیانی داوە بۆ کوردستان.