لە هەولێر ڕۆژانە زیاتر لە 200 بارهەڵگر بەرهەمی ناوخۆ ڕەوانەی پارێزگاكانی عێراق دەكرێن

ئاڤا نیوز

بە مەبەستی پاڵپشتیکردنی جووتیاران و بەرهەمی ناوخۆ لە وەرزی پێگەیشتنی بەرهەمەكان، هاوردەکردنیان بۆ هەرێمی کوردستان قەدەغە دەکرێت، بەپێی گوتەی بەڕێوەبەری كشتوكاڵی هەولێر، ڕۆژانە لە هەولێرەوە زیاتر لە 200 بارهەڵگر بەرهەمی جووتیاران ڕەوانەی پارێزگاكانی عێراق دەكرێن.

وێنە گەورەکە: لە سەرەتای وەرزی پایزدا هاوردەکردنی چەند بەرهەمێک قەدەغە دەکرێت، ئەمەش بۆ زیاتر پاڵپشتیکردنی جووتیاران و بەرهەمی ناوخۆیە، لەگەڵ ئەوەشدا بەهۆی گرنگیدان بەلایەنی کشتوکاڵی لە کابینەی نۆیەمی حکومەتی هەرێمی کوردستان ڕۆژانە بەرهەمی جووتیارانی کورد هەناردەی ناوچەکانی خوارووی عێراق دەکرێت.

لێدوانی فەرمی: هێمن سەید موڕاد، بەڕێوەبەری گشتیی کشتوکاڵی هەولێر، بە ئاڤای ڕاگەیاند، ڕۆژانە زیاتر لە 200 بارهەڵگر لە بەرهەمی جووتیارانمان هەناردەی شارەكانی خواروو  و ناوەڕاستی عێراق دەکرێن.

لەکاتی پێگەیشتنی بەرهەمی ناوخۆ، هاوردەکردن قەدەغە دەکرێت، هاوکات بەشێک لە بەرهەمەکان لەلایەن حکومەتی هەرێمی کوردستانەوە باجی دەخرێتە سەر بۆ ئەوەی پشتیوانی بەرهەمی ناوخۆ بکرێت.

زانیاریی زیاتر: هاوردەکردنی بەرهەمی هەنار بەهۆی پێگەیشتنی بەرهەمی ناوخۆ لە 15-08-2025 تا 15-12-2025، قەدەغەیە، هاوکات ژمارەیەک بەرهەم هەیە لە هەر چوار وەرزی ساڵدا قەدەغەیە لەوانەش پەتاتە، تور، سڵق، شێلم، کەلەم، گۆشتی مریشک و هێلکە.

ئەوەی پێویستە بیزانیت: ڕۆژانە چاودێری بازار دەکرێت هەر کەسێک لەکاتی پێگەیشتنی بەرهەمی ناوخۆ هاوشێوەی ئەو بەرهەمانە هاوردە بکات سزا دەدرێت.