کۆمپانیای دیلۆیت بە بەکارهێنانی زیرەکی دەستکرد حکومەتی ئوسترالیا شەرمەزار دەکات

ئاڤا نیوز

دیلۆیت کە کۆمپانیایەکی نێودەوڵەتییە بۆ چاودێری و ڕاوێژکاری چووە بە بەکارهێنانی زیرەکی دەستکردی Azure OpenAIی کۆمپانیای مایکرۆسۆفت، ڕاپۆرتێکی بە زیرەکی دەستکرد ئامادە کردووە و پڕ لە زانیاری هەڵە، بە سەدان هەزار دۆلار بە حکومەتی ئوسترالیای فرۆشتووە. 

چیرۆکی سەرەکی: ئێستا لای هەندێک کەس باو باوی ئەوەیە ڕاپۆرت، لێکۆڵینەوە، تەنانەت ڕۆمان و چیرۆکیش بە زیرەکی دەستکرد ئامادە بکەن و بە ناوی خۆیان بڵاوی بکەنەوە، هەروەها چەندین میدیاش بە زیرەکی دەستکرد هەواڵ وەربگێڕن و ئامادە بکەن؛ بەڵام ئەمجارە گەورە کۆمپانیایەک فێڵێکی گەورەی لە ئوسترالیا کردووە بە بەکارهێنانی ئەو ئامرازە. 

بڵاوکراوەی فەرمی: بەپێی هەواڵێکی ڕۆژنامەی گاردیان'ی بەریتانی،  دیلۆیت کە کۆمپانیایەکی نێودەوڵەتییە بۆ چاودێری و ڕاوێژکاری چووە بە بەکارهێنانی زیرەکی دەستکردی  Azure OpenAIی کۆمپانیای مایکرۆسۆفت، ڕاپۆرتێکی 237 لاپەڕەیی بۆ حکوومەتی ئوسترالیا ئامادە کردووە  لە بەرامبەریشدا بە 440 هەزار دۆلاری ئوسترالی (نزیکەی 290 هەزار دۆلاری ئەمەریکی) لێ کێشاوەتەوە.

زانیاریی زیاتر: دواتر کە پسپۆڕان سەیری ڕاپۆرتەکە دەکەن، دەبینن چ گۆبەندێک نراوەتەوە و چەندین قسەی هەڵبەستراو وەک زانیارییەکانی توێژینەوە زانستییەکان بڵاو کراونەتەوە و چەندین سەرچاوەی ساختە لە پەراوێزدا نووسراون، دوای ئەوەی دەردەکەوێت کۆمپانیای دیلۆیت لە ڕێگای زیرەکی دەستکردی Azure OpenAI GPT – 4o ئەم ڕاپۆرتەی بۆ وەزارەتی کاروباری ناوخۆ و کار ئامادە کردووە، ناچار دەکرێت بڕێک لەو پارەیە بۆ حکومەتی ئوسترالیا بگەڕێنێتەوە.