هۆشداریی خێرا لەبارەی پیسبوونی ئاوی ڕووباری دیجلە دەدرێت

ئاڤا نیوز

 

ئەندامێکی پەرلەمانی عێراق دەڵێت، پشکنین بۆ ئاوی ڕووباری دیجلە کراوە و دەرکەوتووە دوای پرۆسەی پاڵاوتن و پاککردنەوەشی، هەر هەڵگری ڤایرۆسی مەترسیدارە و مرۆڤ تووشی نەخۆشیی مەترسیدار دەکات، بۆیەش داوا دەکات چارەسەری بەپەلە بۆ پیسبوونی ئاوی ڕووبارەکە بکرێت.

 

لێدوانی فەرمی: ئەمیر مەعمووری، ئەندامی پەرلەمانی عێراق ڕایگەیاند، بەگوێرەی ئەو پشکنینانەی وەزارەتی ژینگە ئەنجامی داون، پیسبوونی ئاو لە ڕووباری دیجلە گەیشتووەتە ئاستێکی مەترسیدار و جۆرەها ڤایرۆسی تێدا دۆزراوەتەوە کە بۆ تەندروستیی مرۆڤ مەترسیدارن.

 

ئەوەی پێویستە بیزانیت؛ بەوتەی ئەو پەرلەمانتارە، پشکنینەکان دەریانخستووە ڤایرۆسەکان نەک تەنیا لەڕێگەی خواردنەوە بەڵکو لەڕێگەی خۆشۆردنیشەوە بە ئاوی پیس دەگوازرێتەوە و کەسەکە تووشی دەبێت، بۆیەش ئەگەر چارەسەری بەپەلەی پیسبوونی ئاوی ڕووبارەکە نەکرێت، تەندروستیی خەڵک و دانیشتووان لە مەترسییەکی ڕاستەقینەدایە.

 

بە تەنیشت ئەم بابەتەوە؛ ئەمیر مەعمووری ڕەخنەش لە پشکی ئاوی وڵاتەكەی دەگرێت کە لەلایەن تورکیا و ئێرانەوە بەردەدرێتەوە و داوا دەکات لەڕێگەی کارتی بارزگانییەوە، فشار لەسەر ئەو دوو وڵاتە دروستبکرێت تا ئاو زیاتر بەربدەنەوە.