24 سەربازی ئیسرائیل لە غەزە كوژران

ئاڤا دیجیتاڵ

سووپای ئیسرائیل كوژرانی 24 سەربازی ڕاگەیاند بەهۆی بەردەوامی شەڕ لە غەزە، چەكدارانی فەڵەستینیش دەڵێن "بەهۆى تەقاندنەوەی تانك و ئەو باڵەخانانەی هێزەكانی ئیسرائیلی تێدان ژمارەیەكی زۆری سەربازیان كوژراون".

چیرۆكە سەرەكییەكە: بەهۆی بەردەوامیی شەڕ لەنێوان هێزەكانی ئیسرائیل و چەكدارانی فەلەستین "حەماس" رۆژانە سەدان هاووڵاتیی سیڤیل لە غەزە و دەیان سەرباز و چەكدار دەكوژرێن، بەگوێرەی تازەترین گوتەكانی هێزەكانی بەرگری ئیسرائیل، تەنیا ئەمڕۆ 24 سەربازیان لێ كوژراون.

لێدوانە فەرمییەكان: ئەمڕۆ سێشەممە 23-1-2024 ئیسحاق هێرزۆگ، سەرۆكی ئیسرائیل ڕایگەیاند 21 سەربازی ئیسرائیلی لە یەك ڕۆژی شەڕدا لە غەزە كوژراون.

دانیال هاگاری، گوتەبێژی سەربازی ئیسرائیل ئاماژەی بەوە كرد "ئەو هێرشانە كە بوونەتە هۆكاری كوژرانی ئەم سەربازانە لە نزیك سنووری ئیسرائیل و غەزە ڕوویانداوە كاتێك سەربازانی ئیسرائیل كراونەتە ئامانجی تەقەی ئارپیجی، هاوكات باڵەخانەیەكیان تەقاندووەتەوە كە بەشێك لە سەربازانی ئیسرائیلی تێدابووە".

باكگراوند: لە دوای حەوتی تشرینی یەكەمەوە تا ئێستا 25 هەزار و 295 كەس لە غەزە كوژراون و 63 هەزار كەسی دیكەش بریندارن، ژمارەی كوژراوانی ئیسرائیلیش لەو كاتەوە گەیشتووەتە هەزار و 139 كەس.