شاخەوانێکی کورد ئاڵای کوردستان لەسەر بەرزترین لووتکە چیای ئەسیوپیا بەرز کردەوە

ئاڤا نیوز

 

شاخەوانێکی کورد دەچێتە بەرزترین لووتکە چیای وڵاتی ئەسیوپیا و ئاڵای کوردستان لەسەر ئەو لوتکە چیایە بەرز دەکاتەوە.

 

چیرۆکی سەرەکی: ڕۆژی 13ـی ئەم مانگە، محەممەد باوەکر، شاخەوانی دیاری هەرێمی کوردستان و ئەندامی ڕێکخراوی شاخەوانیی هەڵۆ، لەگەڵ گرووپێکی شاخەوانیی فرەنەتەوەدا توانییان بەسەر لوتکە چیای (ڕاس داشین) سەربکەون و ئاڵای کوردستانی لەسەر ئەو لووتکە چیایە بەرز کردەوە.

 

لێدوانی فەرمی:  محەممەد باوەکر، بە ئاڤا میدیای گوت: گەشتەکەمان لە سەرکەوتن شەش کاتژمێری خایاند و لە هاتنە خوارەوەش چوار کاتژمێری خایاند، گەشتێکی سەخت و پڕ لە سەرکێشی بوو، سوپاس بۆ خوای گەورە گەشتەکە بە سەلامەتی کۆتایی هات و سەرجەم ئەندامانی گرووپەکە بە سەلامەتی گەشتەکەیان تەواو کرد.

 

زانیاریی زیاتر: لووتکە چیای (ڕاس داشین) بەرزترین لووتکە چیایە لە وڵاتی ئەسیوپیا، بەرزییەکەی چوار هەزار و 543 مەترە  و دەکەوێتە پارکی نیشتمانیی چیای سیمیان لە باکووری وڵاتەکە.

 

باکگراوند: محەممەد باوەکر تەمەنی سەرووی 67 ساڵە بەڵام شاخەوانێکی چالاکە و ئەمساڵ بەسەر ژمارەیەک لوتکە شاخی بەرزی جیهان سەرکەوتووە لەوانە؛ لووتکە چیای (چروپ) لە وڵاتی پیرۆ لە ئەمریکای باشوور کە بەرزییەکەی نزیکەی پێنج هەزار و 500 مەترە، هەرسێ لوتکە چیای (ئۆهۆرۆ، ستیلا، کلیمانس) لە زنجیرە چیای کلیمانجارۆ لە وڵاتی تەنزانیای کیشوەری ئەفریقیا، بەرزی هەریەکێک لەو  لووتکە شاخانەش زیاتر لە پێنج هەزر مەترە، محەممەد باوەکر لە هەموو ئەو لووتکە شاخە بەرزانەی سەردەکەوێت لە هەر وڵاتێک بێت ئاڵای کوردستان لەسەر لووتکە شاخەکە بەرز دەکاتەوە.