ئاڤا هۆکاری گرژییەکەی گوندێکی گوێڕ ئاشکرا دەکات؛ کوژراو و بریندار هەیە

ئاڤا نیوز

هاووڵاتییانی گوندی لاجان ڕێگەی گوێڕ - هەولێریان داخست و ڕێگەیان بە هاتووچۆی ئۆتۆمبێلی کۆمپانیایەک نەدەدا، بەهۆیەوە گرژی و ئاڵۆزی دروست بووە، لە ئەنجامدا کەسێک کوژرا و پێشمەرگەیەک و چەند هاووڵاتییەکی دیکەش بریندار بوون. 

بەدواداچوونی ئاڤا: ئاڤا پرسیاری هۆکاری دروستبوونی گرژییەکەی لە لایەنە ئەمنییە پەیوەندیدارەکان کرد و بەمشێوەیە وەڵامییان دایەوە: چەند جارێکە دانیشتووانی ئەم گوندە خۆپیشاندانیان کردووە، بەڵام ئەمجارە بەهۆی ئەوەی ئەوانەی گردبوونەتەوە، بەشێکیان چەکیان پێبووە، تەقە کراوە، ڕووبەڕووبوونەوە ڕوویداوە، لە هەردوولا بریندار هەیە، کەسێک کوژراوە تا ئێستا ناسنامەکەی دیارنییە و ئێستا کۆبوونەوەی ئەمنی هەیە بۆ چارەسەرکردنی کێشەکە و لێکۆڵینەو لە ڕووداوەکە.

- ئەو سەرچاوە ئەمنییە لەبارەی چوونی هێز بۆ ئەو ناوچەیە ڕایگەیاند: ئەو کەسانە ڕێگایان گرتبوو کە ڕێگەیەکی بازرگانییە، هێزی ئەمنی چووە هاتووچۆی خەڵک بکاتەوە.

لەلایەکی دیکەوە: لەبارەی ئەوەی ئایە خزمەتگوزاریی بۆ دانیشتووانی ئەو ناوچەیە نەکراوە؟، سەرچاوەیەک لەو کۆمپانیایەی کە خۆپیشاندانی لەبەرامبەر کراوە بە ئاڤای ڕاگەیاند: قوتابخانە و  بنکەی تەندروستیان بۆ دروست کراوە، بیری ئاویان بۆ لێدراوە، نزیکەی 70 دانیشتووی گوندەکە و چەندین بارهەڵگریان لای ئێمە دامەزراون و کار دەکەن، هەر داواکارییەک و خزمەتگوزاریی دیکەشیان هەبێت بەسەرچاو بۆیان دەکەین، بەڵام کاری تێکدەرانە قبوڵ ناکەین.

ئەوەی ئێستا ڕوودەدات:  ئاڤا زانیویەتی کۆبوونەوەیەکی ئەمنیی هەیە بۆ لێکۆڵینەوە لە ڕووداوەکە.