ڕووسیا و ئۆکراینا؛ لەلایەک هێرش لەلایەک گفتوگۆی ئاشتی دەکەن

ئاڤا نیوز

لە کاتێکدا ئەمریکا هەوڵەکانی بۆ ڕاگرتنی شەڕی ڕووسیا و ئۆکراینا چڕتڕکردووەتەوە، بەڵام هێرشەکانی ڕووسیا و ئۆکراینا بەردەوامن.

چی ڕوودەدات: بەرپرسانی ئۆکراینا دەڵێن، درەنگانی شەوی شەممە لە هێرشێکی فڕۆکەی بێفڕۆکەوانی ڕووسیا بۆ سەر کێیڤی پایتەختی وڵاتەکە کەسێک کوژرا و 11ـی دیکەش برینداربوون، لە بەرامبەردا، وەزارەتی بەرگری ڕووسیا بڵاویکردەوە، هێزەکانی بەرگریی ئاسمانی لە شەوێکدا 33 فڕۆکەی بێفڕۆکەوانی ئۆکراینیان خستەخوارەوە.

زانیاریی بەدەستهاتوو: بۆ جاری دووەم شاندی ئۆکراینا و ئەمریکا بۆ تاتوێیکردنی پلانی ترەمپ کۆدەبنەوە هەر یەکە لە مارکۆ ڕۆبیو، وەزیری دەرەوەی ئەمریکا و ستیڤ ویتکۆف، نێردەی تایبەتی ترەمپ، جارێد کوشنەر زاوا و ڕاوێژکاری ترەمپ لەگەڵ دانوستانکارانی ئۆکراینا کە ڕوستێم ئومێرۆڤ وەزیری پێشووی بەرگریی وڵاتەکە سەرۆکایەتیی شاندەکە دەکات لە فلۆریدا کۆدەبنەوە.

زانیاریی زیاتر: بڕیارە لە چەند ڕۆژی داهاتوودا ستیڤ ویتکۆف، نێردەی ترەمپ سەردانی مۆسکۆ بکات و تاتوێی پلانی ئاشتی ترەمپ لەگەڵ لایەنی ڕووسی بکات.