وەرگرتنی بڕوانامەی دەرچوون لە زانکۆی سەڵاحەددین دەکرێتە ئەلیکترۆنی

ئاڤا نیوز

زانکۆی سەڵاحەددین مامەڵەی وەرگرتنی بڕوانامەی دەرچوونی قوتابییانی کردە ئەلکترۆنی، دەرچووان دەتوانن بە شێوازی ئەلیکترۆنی داواکاری بۆ بڕوانامەی دەرچوون پێشکەش بکەن.

وێنە گەورەکە: حکومەتی هەرێمی کوردستان پاڵپشتی لە بە ئەلیکترۆنیکردنی کاروباری دام و دەزگاکان دەکات و چەندین مامەڵەی هاووڵاتییان کراون بە ئەلیکترۆنی، ئەم پرۆسەیە لە زانکۆکانیش دەستیپێکردووە، زانکۆی سەڵاحەددینیش پرۆسەی بە ئەلیکترۆنی کردنی بڕوانامە و پشتگیری دەرچوونی ڕاگەیاندووە.

لێدوانی فەرمی: سامان عەبدوڵڵا، بەڕێوەبەری ڕاگەیاندنی  زانکۆی سەڵاحەددین، بە ئاڤا میدیای ڕاگەیاند،  دوای ئەم هەنگاوە سەرجەم کاروبارەکانی تۆماری گشتیی زانکۆی سەڵاحەددین بووە ئەلیکترۆنی، دەرچووان دەتوانن لە ماڵەوە لە ڕێگەی مۆبایلەکانیان داوای بڕوانامەی دەرچوون یان پشتگیری دەرچوون بکەن.

زانیاریی زیاتر: سامان عەبدوڵڵا، دەڵێت، کاتێک قوتابی داوای بڕوانامەی دەرچوون یان پشتگیری دەکات لەلایەن تۆماری گشتیی کاری لەسەر دەکرێت و لە ڕێگەی کۆمپانیای ئەنگڵ پۆست بۆ داواکارە دەنێردرێتەوە ماڵەوە، لە ئێستادا پارەکە بە کاش وەردەگیرێت، بەڵام لە داهاتوو پارەدانیش دەکرێتە ئەلیکترۆنی.

ئەمەش بزانە: ئەم سیستەمە تایبەتە بە قوتابییانی دەرچووی بەکالۆریۆس لە زانکۆی سەڵاحەددین، لەسەر ئەم بابەتە کۆبوونەوەیەکی تایبەت لەگەڵ بەڕێوەبەری تۆماری کۆلێژەکان ئەنجامدرا و چۆنییەتی ڕێکارەکان شیکراوەتەوە.

ئەوەی پێویستە بیزانیت: لە ڕۆژی یەکشەممەی داهاتوو 14-12-2025  داواکردنی بڕوانامە و پشتگیری دەرچوون بەم سیستەمە دەکەوێتە کار، لە ڕێگەی ئەم لینکەوە دەتوانن دەرچووان داواکاری پێشکەش بکەن.