بۆ نەهێشتنی کاریگەرییەکانی دروستبوونی لافاو تیمەکانی شارەوانی هەولێر لە ئامادەباشیدان

ئاڤا نیوز

بە هۆی هاتنی شەپۆلێکی چڕی بارانبارینەوەی سەرجەم تیمەکانی شارەوانی هەولێر، ڕاسپێردراون تاوەکو لەو شوێنانەی مەترسی لافاو هەیە ئامادەییان هەبێت. 

وێنە گەورەکە: شەپۆلێکی چڕی بارانبارین ڕووی لە شار و شاروچکەکانی هەرێمی کوردستان کردووە، بەهۆی پێشبینییەکانی کەشناسی، ئەگەر هەیە لە هەندێک شوێن ئاو کۆببێتەوە و ببێتە هۆی دروستبوونی لافاو، لایەنە پەیوەندیدارەکانیش ئامادەکاریی تەواویان کردووە و تیمەکانیان لە ئەرکدان. 

لێدوانی فەرمی: کارزان هادی، سەرۆکی شارەوانیی هەولێر بە ئاڤا میدیای گووت، ‎لەسەر فەرمانی سەرۆکوەزیران مەسرور بارزانی هەموو تیمەکان ڕاسپێردراون کاربکەن بۆ نەهێشتن و کەمکردنەوەی کاریگەرییەکانی دروستبوونی لافاو، بۆ هەمان مەبەست پێشتر لە پلانی درێژخایەن چەندین پڕۆژەی ستراتیژی جێبەجێکراون، هەروەها ڕەزامەندی دراوە بۆ دروستکردنی 35 پۆند، بەشێکیان تەواوکراون و بەشێکیشیان کاری تێدا دەکرێت، ژمارەیەک پڕۆژەی ئاوەڕۆ و فراوانکردنی شەقامە جووتسایدەکانیش جێبەجێکراون.

 - لە پلانی ئامادەکاریی وەرزییدا، چاڵ و ڕێڕەوی کەندەکان پاککراونەتەوە، لەکاتی پێویستیشدا تیمەکانی شارەوانی و ئامێرەکان لەو شوێنانە دەبن کە مەترسی دروستبوونی لافاوی هەیە.

ئەمەش بزانە: پێش دەستبەکاربوونی کابینەی نۆیەمی حکومەتی هەرێمی کوردستان، لە هەولێر 60 شوێن هەبوو کە مەترسی دروستبوونی لافاویان هەبوو، بەڵام بەهۆی کارکردن لەسەریان، ئێستا تەنها شەش شوێن ماوەتەوە و دەرخستەیان بۆ کراوە، لە ئایندەیەکی نزیکدا کار لەسەر ئەو شوێنانەش دەکرێن.