هەوڵ بۆ زیادکردنی مووچەی 70 هەزار خاوەن پێداویستیی تایبەت دەدرێت

ئاڤا نیوز

وەزارەتی کار و کاروباری کۆمەڵایەتی، لیستی خاوەن پێداویستییە تایبەتەکان ئامادە دەکات بۆ ئەوەی مووچەیان لەگەڵ حکومەتی عێراق بۆ هاوتا بکرێت.

 

چیرۆکی سەرەکی: دووشەممەی ڕابردوو لە پەرلەمانی عێراق یاسای خاوەن پێداویستیی تایبەتی ژمارە 38ـی ساڵی  2013 هەموار کرایەوە و مووچەی خاوەن پێداویستییە تایبەتەکان لە 170 هەزار دینارەوە بۆ  250 هەزار دینار زیاد کرا.

ئەوەی پێویستە بیزانیت: حکومەتی هەرێمی کوردستان کار لەسەر ئەوە دەکات بڕیارەکە هەرێمی کوردستانیش بگرێتەوە و بۆ ئەم مەبەستە لیژنەیەک پێک هێنراوە.

بۆچی گرنگە: بە هاوتاکردنی مووچە، خاوەن پێداویستییە تایبەتەکان بڕی 100 هەزار دینار یان زیاتریان دەچێتە سەر مووچەکەیان.

لێدوانی فەرمی: ئاریان ئەحمەد ـ  گوتەبێژی وەزارەتی کار و کاروباری کۆمەڵایەتی بە ئاڤا نیوزی گوت: بەوردی کار لەسەر ئامادەکردنی لیستی خاوەن پێداویستییە تایبەتەکان دەکرێت و بەم نزیکانە تەواو دەبێت و ڕەوانەی بەغدا دەکرێت.

ژمارەکان وادەڵێن: لە هەرێمی کوردستان 100 هەزار خاوەن پێداویستیی تایبەت هەیە کە 63 هەزار و 200 یان مووچەی 150 هەزار دیناری و 6 هەزاو 800یان فەرمانبەری حکومەتن و بڕی 100 هەزار دیناریان وەک دەرماڵە پێ دەدرێت.

زانیاریی زیاتر: لە ساڵی 2013ـەوە بڕینەوەی مووچە بۆ خاوەن پێداویستییە تایبەتەکان ڕاگیراوە، لەو کاتەوە 30 هەزار خاوەن پێداویستیی تایبەت تۆمار کراون کە 13 هەزار و 227 کەسیان بە لێژنە ناویان بۆ ئەنجوومەنی وەزیران بەرز کراوەتەوە تاڕەزامەندی لەسەر دابینکردنی مووچەکەیان بدرێت.