سورێژە هەڕەشە لە ئەوروپا دەكات

ئاڤا دیجیتاڵ

 

رێكخراوی تەندروستیی جیهانی و رێكخراوە تەندروستییەكانی ئەوروپا هۆشداری لە بەرزبوونەوەی چاوەڕواننەكراوی تووشبوون بە سورێژە دەدەن.

چیرۆكی سەرەكی: رێكخراوی تەندرووستیی جیهانی رایگەیاند لە ساڵی 2023، لە ئەوروپا، تووشبوون بە سورێژە بۆ 40 هێندە زیادی كردووە و ئەمەش جێگەی نیگەرانییە. 

ژمارەكان وادەڵێن: لە نێوان ساڵی 2023 دا زیاتر لە 42 هەزار و 200  حاڵەتی تووشبوون بە سورێژە لە ناو 41 وڵاتی ئەندامی ئەوروپیی رێكخراوی تەندرووستیی جیهانی تۆمار كراون. 

21 هەزار تووشبوو لە نەخۆشخانە خەوێندراون و پێنج كەسیشیان گیانیان لەدەستداوە، ئەمە لە كاتێكدایە كە ساڵی 2022، تەنیا 941 حاڵەتی تووشبوون بە سورێژە تۆمار كرابوون. 

ئەوەی لەبارەیەوە دەگوترێت: ناوەندی ئەوروپی بۆ بەرگرتن و كۆنترۆڵكردنی نەخۆشییەكان لە راپۆرتێكیدا ئاماژی بەوە كردووە كە بە هۆی كەرەنتینەی كاتی بڵاوبوونەوەی كۆرۆنا نەخۆشی سورێژە بەرەو نەمان چووە، بەڵام دواتر لە مانگی حوزەیرانی 2023ەوە ئەم نەخۆشییە سەریهەڵداوەتەوە و بەردەوام لە زیادبووندایە. 

 

لەلایەكی دیكەوە: ئاژانسی تەندروستیی بەریتانیا دۆخی لەناكاوی لە ناوچە ناوەندییەكانی ئینگلتەرا راگەیاندووە. هەروەها رۆمانیا ئاستی هۆشداریی تەندرووستیی بۆ پلەی سوور بەرز كردووەتەوە. نەمساش رایگەیاندووە لە سەرتای ساڵی 2023ەوە هەوڵی لەناوبردنی نەخۆشییەكەی داوە، بەڵام نزیكەی 200 حاڵەت تۆمار كراون. ئەوەش لەكاتێكدایە ساڵی رابردوو، لە فەرەنسا 64 حاڵەت و لە ئەڵمانیاش 57 حاڵەتی سورێژە تۆمار كراون. 

 چارەسەر چییە: ناوەندی تەندرووستییەكانی ئەوروپا هۆكاری سەرەكیی بڵاوبوونەوەی ئەم نەخۆشییە ڤایرۆسییە بۆ ئەوە دەگەڕێننەوە كە ڤاكسینەكردن لە دژی سورێژە لە وڵاتانی ئەوروپا ناچاری نییە.