لە سبەیەوە بڕیاری بەرزکردنەوەی نرخی بەنزین لە عێراق جێبەجێ دەکرێت

ئاڤا نیوز

سەرەڕای ناڕەزایی خەڵک، لە سبەی چوارشەممەوە بەرزکردنەوەی نرخی بەنزین لە عێراق دەچێتە بواری جێبەجێکردنەوە.

ئەوەی پێویستە بیزانیت: لەمەودوا نرخی بەنزین لە عێراق بەمشێوەیە دەبێت، بەنزینی 650 دیناری موحەسەن دەبێتە 850 دینار، سوپەر لە هەزار دینارەوە دەبێتە هەزار و 250 دینار.

نووسراوی فەرمی: بەپێی نووسراوێکی کۆمپانیای دابەشکردنی بەرهەمە نەوتییەکان، کە ئەمڕۆ سێشەممە بڵاوکراوەتەوە، بەپێی بڕیاری ئەنجوومەنی وەزیرانی عێراق، لە 1-5-2024 ەوە نرخی بەنزین دەگۆڕێت و زیادەکەی ڕەوانەی وەزارەتی دارایی دەکرێت و بڕیارەکەش سێ مانگ تاقیکاری دەبێت.

وێنە گەورەکە: ڕۆژی 26 ی ئاداری ئەمساڵ، لە کۆبوونەوەی ئەنجوومەنی وەزیرانی عێراق بڕیاردرا نرخی بەنزینی موحەسەن و سوپەر گران بکرێت.

ئەمەش بزانە: نرخی بەنزینی 450 دیناری لە عێراق هەروەک خۆی دەمێنێتەوە، لەپێناو ئەوەی کاریگەری نەبێت لەسەر ئەو ئۆتۆمبێلانەی بە کرێ کاردەکەن.

کاریگەری و لێکەوتەکان: بڕیاری بەرزکردنەوەی نرخی بەنزین لە بەغدا و چەند پارێزگایەکی دیکە پێشتر ناڕەزایی لێکەوتەوە.