چارەنووسی خێزان و منداڵەکانی داعش نادیارە

ئاڤا نیوز

 

پێنج ساڵ دوای ئەوەی داعش دواهەمین پێگەی خۆی لە باغۆز لە سووریا لەدەست دا، هێشتا هەزاران چەکداری گومانلێکراوی داعش و خێزانەکانیان لە کەمپەکانی باکووری ڕۆژهەڵاتی سووریا دەستبەسەرن.

 

وێنە گەورەکە: زۆربەی وڵاتان ئامادە نین ئەو هاووڵاتیانەیان کە لە کەمپەکانی باکووری ڕۆژهەڵاتی سووریان وەربگرنەوە، بەڵام ئەمریکا بڕیاری داوە 11 کەسیان وەربگرێتەوە و بۆ ئەمریکایان بگەڕێنێتەوە.

 

لێدوانی فەرمی: ئەنتۆنی بلینکن، وەزیری دەرەوەی ئەمریکا ڕایگەیاند: "چارەسەری درێژخایەن بۆ ئەم قەیرانە ئەوەیە کە وڵاتان ئەو کەسانە وەربگرنەوە، ڕایانبهێننەوە، تێکەڵیان بکەنەوە و دڵنیا ببنەوە لەوەی کە بەرپرسیار بن لە بەرامبەر ئەو هەڵانەی کە ئەنجامیان داون".

 

زانیاریی زیاتر: لە ناو ئەو 11 کەسەدا، 10 کەسیان سەر بە یەک خێزانن.

 

لە لایەکی دیکەوە: ئامادەکاری دەکرێت بۆ گەڕاندنەوەی شەش کەنەدی، چوار ئەڵمانی و یەک فینلەندی بۆ وڵاتەکانیان.

 

ئەوەی پێویستە بیزانیت: لە هەر دوو کەمپی هۆل و ڕۆژ لە پارێزگای حەسەکە، زیاتر لە 30 هەزار کەس کە خەڵکی زیاتر لە 60 وڵاتی جیهانن دەستبەسەرن، بەشی هەرە زۆری ئەم کەسانە منداڵن.

 

مەترسییە پێشبینیکراوەکان: شارەزایان هۆشداریی دەدەن ئەگەر ئەم وڵاتانە هاووڵاتییەکانیان لەم کەمپانە نەبەنەوە و تێکەڵی کۆمەڵگاکانیان نەکەنەوە، ئەگەری هەیە ئەم کەمپانە ببنە هۆی بەرهەمهێنانی نەوەیەکی نوێ لە داعش لە منداڵانی بێناسنامە.