قاسم ئەعرەجی: هەرێمی کوردستان، هەرێمێکی دەستوورییە

ئاڤا نیوز

 

سەرۆکوەزیران بارزانی گەیشتە بەغدا و یەکەم دیداریشی لەگەڵ قاسم ئەعرەجی، ڕاوێژکاری ئاسایشی نەتەوەیی عێراق بوو.

 

وێنە گەورەکە: بەیانی ئەمڕۆ پێنجشەممە 30-05-2024 سەرۆكوەزیران بارزانی بۆ چارەسەری كێشەكانی نێوان هەرێمی كوردستان و عێراق، گەیشتە بەغدا، گفتوگۆ بۆ برەودان بە هاریکاری و هاوئاهەنگیی نێوان هەردوولا لە پێناو پاراستنی ئاسایش و سەقامگیریی عێراق و هەرێمی کوردستان دەکەن.

لێدوانی فەرمی: ڕاوێژكارى ئاسايشى نەتەوەیی عێراق، لە کۆبوونەوەکەدا ئاماژەی بەوە دا کە هەرێمی کوردستان، هەرێمێکی دەستوورییە و بەهێزيی هەرێمی کوردستان، بەهێزيی عێراقە و بە پێچەوانەشەوە، بۆیە دەبێت باشترین پەیوەندی لەنێوان هەرێمی کوردستان و حکومەتی فیدراڵدا هەبێت.

بۆچوونی لایەنی بەرامبەر: سەرۆکوەزیران بارزانی سوپاسی پێشوازیی گەرم و دۆستانەی ڕاوێژکاری ئاسایشی نەتەوەیی عێراقی کرد و دووپاتی کردەوە کە لە ڕووی ئەمنییەوە، هەماهەنگییەکی باش لە نێوان هەرێمی کوردستان و حکومەتی فیدراڵدا هەیە و هیوادارین ئەم هەماهەنگییە باشە لە هەموو بوارەکانی دیکەشدا ڕەنگ بداتەوە.

 

ئەوەی پێویستە بیزانیت: سەرۆکوەزیران بارزانی لە سەردانەکەیدا بۆ بەغدا لەگەڵ سەرۆکوەزیرانی عێراق و سەرکردە سیاسییەکانی لایەنە جیاوازەکان کۆدەبێتەوە.