نرخی بەنزین لە سووریا بۆ سێ هێندەی نرخی ئاسایی بەرز بووەتەوە

ئاڤا نیوز

لە پارێزگای حەلەب لە سووریا، نرخی بەنزین بەراورد بە هەفتەی پێشوو بۆ سێ هێندەی نرخی ئاسایی لە بازاڕ دەفرۆشرێت.

وێنە گەورەکە:ماوەیەکە گرفتی کەمی سووتەمەنی لە شارەکانی سووریا سەریهەڵداوە، گرفتێکی دیکەی ئەو وڵاتە بێ بەهابوونی دراوەکەیەتی، ئەمەش دوای سەرهەڵدانی خۆپیشاندان و ئاڵۆزییەکانی ئەو وڵاتە لەساڵی 2011-ەوە.

لێدوانی فەرمی: هاوڵاتییەک لە پارێزگای حەلەب بۆ ئاڤا نیوز قسەی کردووە دەڵێت "حاڵمان بەتەواوی پەرێشان بووە، ئەو کێشەیە هۆکارەکەی کەمی دابەشکردنی بەنزینە لە بەنزیخانە حکومییەکان، مانگی دووجار دابەش دەکرێت، هۆکارێکی دیکە فرۆشتنەوەی ئەو کۆبۆنانەن کە لەلای هاوڵاتییانە".

لە لایەکی دیکەوە: ڕوانگەی سووری بۆ مافەکانی مرۆڤ بڵاویکردووەتەوە: ئەم چەند ڕۆژە نرخی لیترێک بەنزین بە 40 هەزار لیرەی سووری دەفرۆشرێت، لەکاتێکدا هەفتەی پێشوو نرخی هەر لیترێکی بە نزیکەیی 12 هەزار لیرەی سووری بووە.

ئەوەی پێویستە بیزانیت: ئێستا هەر دۆلارێک بەرامبەر بە 14 هەزار و 800 لیرەی سوورییە، لەگەڵ ئەوەدا یەک هەزار دیناری عێراقی بەرامبەر 10 هەزار لیرەی سورییە، بەم نرخەی ئێستا هەر لیترێک بەنزین لە پارێزگاکانی سووریا بە چوار هەزار دیناری عێراقییە.