بڕیاری لەسێدارەدانی توماج ساڵحی هەڵوەشێنرایەوە

ئاڤا نیوز

دادگەی باڵای ئێران، بڕیاریدا بە هەڵوەشاندنەوەی سزای لەسێدارەدانی هونەرمەند "توماج ساڵحی" ئەو هونەرمەندەی زیاتر لە ساڵێک و شەش مانگە لە زینداندایە.

چیرۆكی سەرەكی: توماج ساڵحی، ڕاپەرێکی ئێرانییە و تۆمەتبارە بە ڕێکخستنی ئەو ناڕەزایەتییانەی لە مانگی ئەیلوولی 2022 لە ئێران بۆ پاڵپستی لە ژینا ئەمینی دەستیپێکرد و سزای لەسێدارەدانی بەسەردا سەپێنرا.

لێدوانی فەرمی: ئەمیر ڕەئیسیان، پارێزەری هونەرمەندەکە، لە تۆڕی کۆمەڵایەتی ئێکس بڵاویکردەوە: بەپێی بڕیاری دادگەی باڵا، سزای لەسێدارەدانی ئەو ڕاپەرە هەڵوەشێنراوەتەوە و دۆسیەکە ڕەوانەی دادگەیەکی هاوشێوە دەکرێت.

ئەوەی پێویستە بیزانیت: دادگەی باڵا لە بڕیارەکەی خۆیدا جەختی کردووەتەوە، سزای زیندانیکردنی هونەرمەندەکە شەش ساڵ و سێ مانگ بووە و بەبێ ڕەچاوکردنی ڕێسا و یاساکان بووە.

وێنە گەورەكە: لە ساڵی 2022 خۆپیشاندانی گەورە شارەكانی ئێرانی گرتەوە، دوای ئەوەی بەهۆی نەپۆشینی لەچك كچێكی كورد بەناوی " ژینا ئەمینی" دەستگیركرا و دواتر لە بنكەیەكی پۆلیس گیانی لەدەستدا.