مووچەی فەرمانبەرانی وەزارەتی کارەبا لە داهاتی ناوخۆ دابەش دەکرێت

ئاڤا نیوز

وەزارەتی دارایی و  ئابووری لە داهاتی ناوخۆ پارە بۆ مووچەی فەرمانبەرانی وەزارەتی کارەبا تەرخان دەکات و دەست بە دابەشکردنی دەکات.

وێنە گەورەکە: بەهۆی دواکەوتنی خەرجکردنی مووچەی مانگی شەشی فەرمانبەرانی وەزارەتی کارەبا بۆ ماوەی 24 ڕۆژ لەلایەن وەزارەتی دارایی عێراق، وەزارەتی دارایی و ئابووری هەرێمی کوردستان لە داهاتی ناوخۆ پارەی بۆ تەرخان کردوون.

ئەوەی پێویستە بیزانیت: پارەی مووچەی فەرمانبەرانی وەزارەتی کارەبا نزیکەی 13 ملیار و 500 ملیۆنە، ئاڤا نیوز زانیویەتی ئەمڕۆ چوارشەممە لە داهاتی ناوخۆی هەرێمی کوردستان بڕیاری خەرجکردنی دراوە و ئەگەر سبەی ڕێکارەکان تەواوبن دەست بە دابەشكردنی دەکرێت.

لێدوانی فەرمی: ئەردەلان  دۆسکی، سەرۆکی  دیوان لە وەزارەتی کارەبا بە ئاڤا نیوزی گوت: "بۆچوونێک  هەبوو مووچەی مانگی شەش لەگەڵ مانگی حەوت خەرج بکرێت و فەرمانبەرانمان دوو مووچە پێکەوە وەربگرن، بەڵام وەزارەتی دارایی بڕیاری داوە لە داهاتی ناوخۆ دابەشی بکات".

 

باکگراوند: بەهۆی ئەوەی وەزارەتی دارایی عێراق تێبینی لەسەر لیستی مووچەخۆرانی وەزارەتەکە هەبوو، لەگەڵ مووچەی فەرمانبەرانی مەدەنی و هێزە ئەمنییەکان پارەی بۆ خەرج نەکردن، هەرچەندە کێشەکە چارەسەر کراوە، بەڵام تاوەکو ئێستا پارەکە خەرج نەکراوە.