عێراق پەیوەست بە دۆلار گرێبەست لەگەڵ کۆمپانیایەکی ئەمریکی دەکات

ئاڤا نیوز 

بانکی ناوەندیی عێراق بە ئامانجی دۆزینەوەی دەرچەیەک بۆ گەڕاندنەوەی ئەو بانکانەی وەزارەتی گەنجینەی ئەمریکا مامەڵەکردن بە دۆلاری لێ قەدەغە کردوون، گرێبەستێکی لەگەڵ کۆمپانیای ئۆلیڤەر وایمانی ئەمریکی واژۆ کرد.

وێنە گەورەکە: لە عێراق  زیاتر لە 70 بانک هەیە و لەو ژمارەیەش پێنجیان حکومین، ئەوانی دیکە سەرجەمیان بانکی ناحکومین و لە ماوەی ڕابردووشدا بەهۆی پابەندنەبوونیان بە ڕێنماییەکان، بەشێک لە بانکە ناحکومییەکان لەلایەن وەزارەتی گەنجینەی ئەمریکاوە پێدانی دۆلارییان بە نرخی 132 هەزار دینار بپ هەر 100 دۆلارێک لێ قەدەغە کرا.

ڕاگەیێنراوی فەرمی: بانکی ناوەندی عێراق بڵاویکردەوە، شاندی بانکی ناوەندی لە نیویۆرک بەردەوامە لە کۆبوونەوەکانی، لەو چوارچێوەیەشدا بە ئامانجی زیادکردنی بەکارهێنانی کارتی بانکی لەلایەن هاووڵاتیانەوە، گفتوگۆیان لەگەڵ کۆمپانیاکانی ماستەر کارد، ڤیزا کارد و مۆنی گرام کردووە، هەروەها بۆ هەمان مەبەستیش لەگەڵ کۆمپانیای نێودەوڵەتی بواری وردبینی (KPMG) گفتوگۆ کراوە. 

زانیاریی زیاتر: بە ئامانجی پێداچوونەوەیەکی گشتگیر بە کەرتی بانکی عێراق و گونجاندنیان لەگەڵ پێوەرە نێودەوڵەتییەکان، لەناویشیدا دۆزینەوەی چارەسەرێکی کرداری بۆ ئەو بانکانەی فرۆشتنی دۆلارییان لێ قەدەغە کراوە، گرێبەستێک لەگەڵ کۆمپانیای ئۆلیڤەر وایمانی ئەمریکی واژۆ کراوە کە کۆمپانیایەکی نێودەوڵەتییە لەبواری وردبینی دارایی.