ئیسرائیل سەركردەیەكی باڵای حیزبوڵڵای لوبنان و جێگرەكەی دەكوژێت

ئاڤا نیوز

سوپای ئیسرائیل پشتڕاستی کردەوە، لە هێرشێکدا عەلی دبس، یەکێک لە سەرکردەکانی حیزبوڵڵای لوبنان و جێگرەکەی و یاریدەدەرێکی دیکەی لە لوبنان کوژراون.

ڕاگەیێنراوی فەرمی: عەلی محەممەد دبس، فەرماندەی هێزەکانی ڕەدوانی حیزبوڵڵا لە لوبنان، ئیبراهیم عیسا و یاریدەدەرێکی دیکەی کوژران، هێرشەکە لە ڕێگەی فڕۆکەیەکی بێفڕۆکەوانی ئیسرائیل کراوە و بە دیاریکراویی فەرماندەیی هێزەکانی حیزبوڵڵا لە لوبنان کراوەتە ئامانج.

ئەوەی پێویستە بیزانیت: بەگوتەی میدیاکانی ڕۆژئاوا فەرماندەیی هێزەکانی ڕەدوانی حیزبوڵڵا لقێکی تایبەتی چەکدارانی حیزبوڵڵای لوبنانە و ڕاستەوخۆ لەلایەن سوپای پاسدارانی ئێرانەوە ڕاهێنانیان پێ دەکرێت. 

 

باکگراوند: لە حەوتی ئۆکتۆبەری ساڵی ڕابردووەوە، کە شەڕ لەنێوان حەماس و ئیسرائیل سەریهەڵداوە، ناوبەناو گرژی سەربازیی لەنێوان حیزبوڵڵای لوبنان و ئیسرائیل ڕوودەدات، دوای ئەوەی حیزبوڵڵا وەک پاڵپشتی بۆ حەماس چەند جارێک مووشەکی گرتە ئیسرائیل، بەوهۆیەشەوە دەیان کەس لە سنووری لوبنان ئیسرائیل کوژراون کە بەشێکی زۆریان سڤیلن.