ئێران جارێکی دیکە ئاوی زێی بچووک دەگرێتەوە

ئاڤا نیوز 

جارێکی دیکە ئێران ئاوی زێی بچووکی گرتەوە و بەهۆیەوە لە سنووری قەڵادزێ ئاستی ئاوی زێیەکە بەشێوەیەکی بەرچاو کەمی کردووە.

وێنە گەورەکە: نزیکەی حەوت ساڵە بەنداوی کۆڵەسە لەسەر ئاوی زێی بچووک لە سنووری شاری سەردەشتی ڕۆژهەڵاتی کوردستان دروستکراوە، ساڵانە لە وەرزی هاوین ئێران ئاوی بەنداوەکە دەگرێتەوە و گرفت بۆ دانیشتووانی قەڵادزێ و پشدەر دروست دەکات.

لێدوانی فەرمی: مارف مەحموود، بەڕێوەبەری پڕۆژەی ئاوی خاس لە قەڵادزێ، کە لەسەر زێی بچووک دروستکراوە و ئاوی پاک بۆ دانیشتووانی قەڵادزێ دابین دەکات، بە ئاڤا نیوزی ڕاگەیاند: نیوەڕۆی ئەمڕۆ دیسان ئێران ئاوی زێی بچووکی گرتەوە و ئاستی ئاوی ئەو حەوزەی بۆ گلدانەوەی ئاوی پڕۆژەی خاس دانراوە گەیشتە دوو مەتر و 17 سانتیمەتر".

ئەوەی پێویستە بیزانیت: ئەمساڵ ئەوە دووەمجار ئێران ئاوەکە دەگرێتەوە و جارەکەی دیکە کە دوو هەفتە پێش ئێستا  بوو، بۆ ماوەی ڕۆژێک سەرجەم دانیشتووانی قەڵادزێ بێئاو بوون کە ژمارەیان 95 هەزار کەسە، بەڵام ئەوکات بەربەست بۆ گلدانەوەی ئاوی زێی بچووک دروستکرا، بۆ ئەوەی ئاو بگاتە پەمپەکانی پڕۆژەی ئاوی خاس.

 

زانیاریی زیاتر: ئەمجارە بەهۆی دانانی بەربەستەکە کێشە بۆ دابەشکردنی ئاوی خواردنەوەی قەڵادزێ دروست نەبووە، بەڵام ئەگەر ئاستی حەوزی گلدانەوەی ئاو بگاتە خوار دوو مەتر دابەشکردنی ئاو دەوەستێت.