مووچەی مانگی حەوتی خانەنشینانی یەکەی 70 دابەش دەکرێت

ئاڤا نیوز

 

بەهۆی کێشە لە بایۆمەترییەکەیان، ماوەی 65 ڕۆژە خانەنشینانی یەکەی 70 مووچەیان وەرنەگرتووە، وەزارەتی دارایی هەرێمی کوردستان کێشەکەی چارەسەر کردووە، لە ماوەی دوو ڕۆژی داهاتوو پارەکەیان بۆ خەرج دەکرێت.

 

وێنە گەورەکە: نزیکەی 10 هەزار خانەنشین کە تێچووی مووچەی مانگانەیان نزیکەی چوار ملیار دینارە، دەبێت دۆسیەکانیان بگوازرێتەوە سەر بەڕێوەبەرایەتیی گشتیی خانەنشینی لە وەزارەتی دارایی و ئابووریی هەرێمی کوردستان، چونکە لەو وەزارەتە هیچ تەرخانکراوێکی داراییان نییە.

 

زانیاریی بەدەستهاتوو: سەرچاوەیەک لە هێزەکانی یەکەی 70 بە ئاڤا نیوزی گوت: "گرفتی مووچەی مانگی حەوتی خانەنشینانی یەکەی 70 چارەسەر کرا و سبەی یان دووسبەی دەست بە دابەشکردنی دەکرێت".

 

ئەوەی پێویستە بیزانیت: پڕۆسەی گواستنەوەی دۆسیەی خانەنشینانی یەکەی 70 بۆ بەڕێوەبەرایەتیی گشتیی خانەنشینی لە وەزارەتی دارایی و ئابووری هەرێمی کوردستان بەردەوامە و پێویستە خانەنشینانی یەکەی 70 بەڵگەنامەکانی بایۆمەتری، کارتی نیشتمانی خۆیان و باوکیان، ناوی چواری دایک و  خێزانەکانیان ڕادەستی بەشی خانەنشینی یەکەکە بکەن، بۆ ئەوەی دۆسیەکانیان بگوازرێتەوە.