میسر لەسەر سنووری غەززە دیوار دروست دەكات

ئاڤا نیوز

وێنەی مانگی دەستكرد ئەوەی ئاشكراكردووە كە میسر، پێش نەخشەی هێرشەكەی ئیسرائیل بۆ سەر ڕەفەح، لە نزیك سنووری نێوان میسر و كەرتی غەززە زەوی تەخت دەكات و دیوار دروست دەكات.

چیرۆكی سەرەكی: وێنەی گیراوی مانگی دەستكردی كۆمپانیای ماكسار تەكنەلۆجی دەریدەخات كە لە سنووری میسر و كەرتی غەززەوە، بۆ مەبەستی نەزانراو، دیوار دروست دەكرێت، لە نزیكیشیەوە كرێكار دەبینرێن زەوی تەخت دەكەن.

ئەوەی پێویستە بیزانیت: میسر بە ئاشكرا دانی بەم دروستكردنەدا نەناوە، بەڵام چەندین جار ئیسرائیلی ئاگادار كردووەتەوە كە بە زۆرەملێ زیاتر لە ملیۆنێك فەڵەستینی لە ڕەفەح بە سنووری میسردا دەربەدەر نەكات. بەڵام ئەم ئامادەكارییەی میسر دەریدەخات خۆی بۆ سیناریۆیەكی لەو شێوەیە ئامادە دەكات.

ئەوەی لەوبارەیەوە دەگوترێت: حكومەتی میسر ئامادە نەبوو وەڵامی پرسیاری ڕۆژنامەنووسان بداتەوە، بەڵام كە لەم بارەیەوە پرسیار لە سوپای ئیسرائیل كرا، سوپا پرسیارەكەی ئاراستەی نووسینگەی بنیامین ناتانیاهۆ كرد، كە ئەویش وەڵامی نەدایەوە.