زیانی هێرشە ئەلیکترۆنییەکەی لوبنان بۆ نۆ کوژراو و سێ هەزار بریندار بەرزبووەوە

ئاڤا نیوز

ژمارەی کوژراوانی هێرشە ئەلیکترۆنییەکەی ئیسرائیل بۆ سەر ئەندامانی حیزبوڵڵای لوبنان بۆ 9 کوژراو و نزیکەی سێ هەزار بریندار بەرزبووەتەوە.

چیرۆکی سەرەکی: کاتژمێر 03:30 خولەکی دوانیوەڕۆی ڕۆژی سێشەممە 17-9-2024، هێرشێکی ئەلیکترۆنی لەلایەن ئیسرائیلەوە کرایە سەر ئامێرەکانی پەیوەندیکردنی ئەندامانی حیزبوڵڵای لوبنان، لەڕێگەی هاککردنەوە لەیەک کاتدا بێتەلەکان تەقێنرانەوە.

لێدوانی فەرمی:  ئاژانسەکانی هەواڵ لە زاری بەرپرسانی وەزارەتی تەندروستیی لوبنان ڕایانگەیاندووە: ژمارەی کوژراوانی هێرشەکە بۆ 9 کوژراو و نزیکەی سێ هەزار بریندار بەرزبووەتەوە، برینی زیاتر لە 200 برینداریش سەختە.

لەلایەکی دیکە: ئەمشەو ڕۆژنامەی نەهاری لوبنانی لەزاری فیراس ئەبیەز، وەزیری تەندروستیی لوبنان بڵاویکردەوە کە زیانە گیانییەکان بۆ 11 کوژراو و 4 هەزار بریندار بەرزبووەتەوە، بەڵام دواتر وەزارەتی تەندروستیی وڵاتەکە ڕەتیکردەوە وەزیر لێدوانێکی لەمشێوەی دابێت.