لە فڕۆکەخانەکانی هەولێر و سلێمانی پێدانی دۆلار بە نرخی بانکی ناوەندی دەستپێدەکاتەوە

ئاڤا نیوز

 

لە هەفتەی داهاتوو پرۆسەی پێدانی دۆلار بە گەشتیاران بە نرخی بانکی ناوەندی لە هەردوو فڕۆکەخانەی هەولێر و سلێمانی دەستپێدەکاتەوە.

 

وێنە گەورەکە: لە مانگی تەمموزی ئەمساڵ بانکی ناوەندی بڕیاریدا پێدانی دۆلار بە گەشتیاران لە هەموو فڕۆکەخانەکانی عێراق دەستپێبکاتەوە، بەڵام دوای دوو مانگ هێشتا لە فرۆکەخانەکانی هەولێر و سلێمانی ئەم پرۆسەیە دەستیپێنەکردووەتەوە.

 

زانیاریی بەدەستهاتوو: سەرچاوەیەک لە بانکی ناوەندی بۆ ئاڤا میدیا قسەیکردووە، دەڵێت: ڕێکارەکانی پێدانی دۆلار بە گەشتیاران بەهەمان نرخی بانکی ناوەندی لە فڕۆکەخانەی هەولێر تەواو بووە و بانکی TBI ئەو پرۆسەیە جێبەجێ دەکات، لە هەفتەی داهاتوودا پرۆسەکە دەستپێدەکات.

زانیاریی زیاتر: ئەو سەرچاوەیە ئەوەش دەڵێت: لە فڕۆکەخانەی سلێمانی بانکی جیهان ئەو پرۆسەیە جێبەجێ دەکات، بەڵام لەبەر هەندێک ڕێکار لەو فڕۆکەخانەیە پرۆسەکە ماوەیەک دەخایەنێت.

 

ئەوەی پێویستە بیزانیت: ئاڤا زانیویەتی ڕێکارەکانی ئەمجارە بەمجۆرەیە؛ ئەو کەسەی گەشت دەکات سەرەتا دەبێت بە ئۆنڵاین لەڕێگەی ماڵپەڕی بانک بەشێوەی ئەلیکترۆنی داواکاری پێشکەش بکات، دواتر پارەکە لە بانک دادەنێت و ئەو ڕۆژەی گەشت دەکات دوای ئەوەی گەشتیار لەخاڵی پشکنینی چوونە دەرەوە تێپەڕی، ئینجا دۆلارەکەی پێ دەدرێت. 

 

باکگراوند: بەپێی بڕیارێکی بانکی ناوەندی عێراق، هەموو ئەو کەسانەی گەشت دەکەن بۆیان هەیە دۆلار بەنرخی بانکی ناوەندی وەربگرن، بۆ هەر 100 دۆلار، 132 هەزار دینارە.