کوردێک وەک وەزیری نوێی ژینگەی عێراق متمانەی پێدرا

ئاڤا نیوز

 

هەڵۆ مستەفا کاکە ڕەزا وەک وەزیری نوێی ژینگەی عێراق سوێندی یاسایی خوارد، لە شوێنی نزار ئامێدی کە پێشتر دەستی لەکار کێشابووەوە.

 

وێنە گەورەکە: لە کۆبوونەوەی ئەمڕۆی ئەنجوومەنی نوێنەرانی عێراق، بە زۆرینەی دەنگ و بەپێی ڕێککەوتنێکی پێشوەختە هەڵۆ مستەفا کاکە ڕەزا وەک وەزیری ژینگەی عێراق متمانەی پێدرا.

 

ئەوەی پێویستە بیزانیت: ڕۆژی 25-10-2024، نزار ئامیدی، وەزیری ژینگەی عێراق دەستی لەکار کێشایەوە. بەپێی ڕێککەوتنی پێکهێنانی حکومەتی عێراق پۆستی وەزیری ژینگە پشکی یەکێتیی نیشتمانیی کوردستانە.

 

باکگراوند: سەرەتای ئەم گۆڕانكارییە وەزارییەی یەكێتی دوای پێنج ڕۆژ هات لە بەڕێوەچوونی هەڵبژاردنی خولی شەشەمی پەرلەمانی كوردستان، بە بڕیاری بافڵ تاڵەبانی، سەرۆكی یەكێتی دەبێتە بەرپرسی مەڵبەندی یەکێتی لە بەغدا، نابێت هیچ کەسێکیش لە یەک کاتدا دوو پۆستی هەبێت، بۆیە نزار ئامێدی دەستبەرداری پۆستی وەزیری ژینگە بوو.