شەپۆلێكی بارانبارین چەند ناوچەیەكی ڕۆژهەڵاتی كوردستان دەگرێتەوە

ئاڤا نیوز

 

شەپۆلێکی بارانبارین ناوچەکانی ڕۆژهەڵاتی کوردستانی گرتووەتەوە و پێشبینی دەکرێت تا دوو ڕۆژی دیکە بەردەوام بێت.

 

وێنە گەورەکە: لە دوێنی شەوەوە شەپۆلێکی بەفر و بارانبارین چەند ناوچەیەکی ڕۆژهەڵاتی کوردستانی گرتووەتەوە و پێشبینی دەکرێت چەند ڕۆژێک بەردەوام بێت. کەشناسیی پارێزگای سنەی ڕۆژهەڵاتی کوردستانیش ئاماژە بۆ دابەزینی پلەکانی گەرما و دروستبوونی تەم و مژ لە چەند ناوچەیەکی پارێزگاکە دەکات.

 

لێدوانی فەرمی: ڕەحیم سەدیقی، بەڕێوەبەری گشتیی کەشناسیی پارێزگای سنە ڕایدەگەیێنێت، لە ئەمڕۆوە تا ڕۆژی دووشەممە، پارێزگاکە لەژێر کاریگەریی شەپۆلێکی بارانبارین دەبێت، لەم ماوەیەشدا جگە لە بارینی باران، ئەگەری هەورەبروسکە هەیە و بای بەهێزی گەرم و تەم و مژ و ڕوو لە چەند ناوچەیەک دەکات، کە بە هۆیەوە مەودای بینین کەم دەبێتەوە.

 

ئەوەی پێویستە بیزانیت: ڕەحیم سەدیقی گوتیشی، ڕێژەی بارانبارین لە ناوچەکانی بانە و مەریوان بەراورد بە ناوچەکانی ڕۆژهەڵات و ناوەڕاستی پارێزگاکە زیاتر دەبێت و پێشبینی دەکرێت لەم ناوچانەدا تاوەکو 20 ملیمەتر باران ببارێت، هاوکات پلەکانی گەرما نزم دەبنەوە و لە ناوچە شاخاوییەکانیش بەفر دەبارێت.

 

لەلایەکی دیکەوە: بە هۆی دواکەوتنی بارانبارینی ئەمساڵ دوێنێ لە زۆربەی مزگەوتەکانی ڕۆژهەڵاتی کوردستان نوێژەبارانە کراوە و بە بارینی یەکەم بارانی ئەمساڵیش خەڵکی ئەو ناوچانە دڵخۆشیی خۆیان دەردەبڕن.